Edward Pieters di fraccion PPA:
*Mester a aplica Ley di Destaho Publico pero no por proba esey
ORANJESTAD (AAN) Fraccion di Partido Patriotico Arubano (PPA), a convoca su conferencia di prensa semanal, Diaranzon mainta, den cual señor Edward Pieters, lider di PPA, a elabora riba un carta cu PPA a manda pa Minister Cicilia, y cu a bay tambe pa cabes di Conseho di Ministro, cu ta Prome Minister Eman y pa demas ministernan tambe.
“Awo mi kier para keto riba e carta aki, pa splica un tiki mas tocante esaki. E carta aki a wordo manda dia 3 di Augustus, dus Dialuna cu a pasa, y e mester bay rumbo Bestuutskantoor”, Pieters a indica.
Edward Pietersz a splica cu e carta aki ta basa riba cuater punto cu a bin dilanti durante un cu reunion PPA a yama, cu a tuma lugar dia 28 di Mei ultimo, pa e fraccion haya mas informacion tocante destaho publico y e zona di desperdicio, entre otro, y nan a haci pregunta pa nan haya documentacion.
El a agrega cu den e caso aki nan a haya for di Serlimar, un contract cu Ecotech como compania priva, y nan a haya tambe un peticion pa sosten.
“Loke nos a pidi tabata un prueba di destaho publico. Nos no a haya esaki”, lider di fraccion di PPA a señala.
El a reitera cu nan a manda un carta unda nan tin cuater punto riba dje pasobra basa riba articulo 20 di e Landsverordening Instelling ATA (Aruba Tourism Authority) e minister tin un poder of autoridad, pa por duna instruccion na ATA, no riba asuntonan specifico. “Articulo 21 ta bira bisa cu bo mester aplica e Ley di Destaho Publico. Kiermen, si Minister duna un aanwijzing e mester keda den e margen di articulo 21 cu ta den e destaho publico. Anto esey nos ta haya falta di dje. Kiermen, for di dia 28 di Mei caba, den e reunion, nos no por a haya ningun prueba pa loke ta trata e destaho publico aki, cu ta basa riba Ley. Ta p’esey nos ta Parlamento, pesey nos ta Parlamentario pa controla, pa salvaguardia nos leynan”, Lider di PPA, Edward Pieters a señala.
El a sigui bisa cu nan a desvia di e articulo 2, cu ta den e mesun Landsverordening, cual ta bisa, den e caso aki, cu e minister ta bin cu un maneho riba recogemento di sushi y zona di desperdicio, pero e bestandsrecht di ATA, no ta pesey. E ta pa nan por mercadea, pa nan por percura pa e producto turistico, etc., pero e no ta pa maneho of recogemento di sushi. Esey ta un tarea di Pais Aruba.
