Siguridad, KIA y capacidad hudicial:
ORANJESTAD (AAN) Presidente di Comision Permanente di Husticia di Parlamento di Aruba y parlamentario di AVP, John Hart, ta presenta un balans di e trabaonan y temanan prioritario cu e comision a atende durante aña parlamentario 2026.
Un di e temanan principal tabata siguridad den trafico, especialmente despues di diferente accidente serio y fatal riba nos camindanan. Hart a solicita Minister di Husticia, drs. Arthur Dowers, pa participa na un ora di pregunta tocante e situacion actual, patronchinan di accidente y medidanan concreto pa fortalece control y prevencion.
“Pueblo di Aruba a keda profundamente conmovi pa varios accidente cu a termina den tragedia. E aumento di e incidentenan aki ta exigi reflexion, responsabilidad y accion,” Hart a expresa.
Den 2026, Parlamento a aproba legislacion tocante stuurmento iresponsabel, conoci como “roekeloos rijden”. Segun Hart, esaki ta un paso importante pa proteha tur usuario di trafico y reduci riesgo riba caminda.
Durante e aña parlamentario, Comision Permanente di Asuntonan Husticial, Integracion y Peticionnan a reuni cu Minister di Husticia y diferente departamento pa fortalece cooperacion institucional y supervision parlamentario. Entre e temanan discuti tabatin e criterio di Ministerio Publico den casonan di kiebro den cas y auto, e proyecto di DIMAS pa flexibilisa permiso temporal y revision di procedimentonan legislativo.
Tambe a dialoga tocante e rol mas proactivo cu e comision por desempeña den proceso di creaccion di ley. Un reto importante ta keda e escasez di personal specialisa, particularmente huristanan legislativo, of “wetgevingsjuristen”.
Comision a trata tambe traficacion y contrabanda di persona, den dialogo cu Coördinatiecentrum Mensenhandel en Mensensmokkel Aruba (CMMA). Un aspecto preocupante ta explotacion laboral den mercado informal, especialmente entre migrantenan y personanan indocumenta. Keho di trahadonan cu no ta ricibi pago of cu ta traha bou di condicionnan inhusto ta un realidad cu merece atencion serio.
Segun Hart, combate traficacion humano ta exigi cooperacion entre autoridadnan, control efectivo y proteccion accesibel pa victima, independientemente di nan status migratorio.
Necesidad di un prizon nobo tambe a haya atencion. Parlamento a ricibi un presentacion di UNOPS, hunto cu e team di Ministerio di Husticia, tocante planificacion y siguiente pasonan necesario pa realisa e proyecto.
Comision a haci seguimento ademas tocante e mocion pa introduci body scanners pa KPA.
“Den un democracia parlamentario, controla Gobierno no ta un opcion, sino un deber constitucional. Un mocion aproba pa mayoria ta representa e boluntad democratico di pueblo y Gobierno mester trat’e cu e seriedad cu e merece,” Hart a enfatisa.
Si un mocion no ta realisabel, Gobierno tin responsabilidad di informa Parlamento y splica e motibonan. Den e caso di body scanners, Minister di Husticia a informa e comision cu lo lansa un proyecto piloto.
Otro topico tabata e partidanan di Landspakket cu ta cay bou di Ministerio di Husticia, incluyendo e plannan pa un Aruba Gaming Board y futuro di Directie Casinowezen. E discusion ta importante pa modernisacion, supervision y regulacion efectivo di sector di casino.
Comision a atende tambe e preocupacion di Ombudsman di Aruba tocante dificultad cu ciudadano ta experimenta pa haya cita y completa proceso di inscripcion na Censo.
“Nos ta papia di un servicio fundamental. E preocupacion principal mester ta e ciudadano cu ta keda atrapa den un sistema cu no ta responde den un termino rasonabel,” Hart a indica.
Den e aña parlamentario nobo, lo convoca un reunion cu minister encarga pa sigui trata e situacion.
Den juni 2026, Hart a invita Minister di Husticia pa un reunion tocante capacidad den cadena hudicial, despues di dirigi preguntanan formal tocante capacidad di Cuerpo Policial Aruba y Recherche pa investiga denuncia y keho di ciudadano. E reaccionnan di Ministerio Publico, Alto Comisario y Ministerio di Husticia ta confirma, segun Hart, cu e preocupacion ta legitimo y merece atencion serio.
Den augustus, Comision di Husticia lo completa e aña parlamentario cu dos reunion adicional. Un lo trata e progreso di Landspakket. Ademas, hunto cu Comision di SDG, lidera pa parlamentario Lindor, e comision lo bishita KIA pa dialoga tocante educacion y formacion profesional.
“Cadena hudicial ta enfrenta reto den personal y recurso material. Nos mester reduci burocracia, amplia capacidad y fortalece liderazgo pa resolve problema, preveni criminalidad y aumenta confianza di pueblo den husticia. Cu Presupuesto Supletorio 2026 na caminda, Parlamento tin oportunidad pa verifica si Gobierno ta destina e recursonan necesario na e prioridadnan di cadena hudicial,” Hart a conclui
