Parlamentario Dangui Oduber kier sa pakico:
- Aunke tin placa pero toch Gobierno ta ignora y no tin boluntad politico
ORANJESTAD (AAN): Den Parlamento, un mocion unanime ta nifica cu tur 21 miembro hunto a dicidi cu algo mester wordo haci. No ta MEP so. No ta oposicion so. Full e Parlamento hunto. Ainda asina, e gobierno di AVP-Futuro ta keda sin ehecuta e mandato di pueblo.
E echo cu gobierno di AVP-Futuro no ta ehecuta e mocionnan no ta bini door di un diferencia di opinion politico. Esaki ta un patronchi fiho di e gobierno aki cu no ta brinda respet, transparencia n’i claridad na su pueblo.
Mocion pa mas fondo pa husticia: E mocion pa duna mas recurso na husticia y pa percura cu nos polisnan haya nan body cam a keda aproba unanimamente. Sinembargo, te cu awe, ni un body cam. Te cu awe, e sindicato di polis mes a manda puntra nos di parlamento con a para cu e asunto aki. Nan ta puntra nos paso gobierno ta den silencio y no ta brinda claridad riba e asunto aki.
Petroleo: Tambe tabatin e mocion pa exploracion industria petrolero. Despues di 3 di januari cu e situacion a cambia na Venezuela, MEP a percura pa trece un mocion pa urgi gobierno explora e posibilidad pa Aruba tambe por beneficia di e desaroyo aki.
E mocion a keda aproba unanimamente mas di ocho luna a pasa. Te cu awe pueblo mes por mira cu no tin ningun avance. No tin ningun splicacion. Puro silencio.
Placa tin: Segun Oduber, Gobierno tin placa, pero pa ken? Ta importante pa pueblo ta consciente cu e gobierno aki tin 700 miyon Florin di surplus. Es decir nan tin 700 miyon Florin cu nan por inverti unda cu abo como votador ta haya importante. Banda di esaki nan tin 291 miyon cu nan a fia na New York, e 50 miyon cu nan a fia na Banco di Seguro Social (SVb), e 42 miyon cu nan a haya di Aruba Tourism Authority (ATA) y e 35 miyon di Aruba Airport Authority (AAA). Pueblo, e placa t’ey, loke e gobierno aki falta ta e boluntad pa uz'e pa bo beneficio.
Un gobierno cu ta ignora e decision di su propio Parlamento, e representantenan di pueblo, no ta gobernando su pais. E ta administrando su propio agenda. E pregunta cu mi ta haci na e gobierno ta simpel: si e placa t’ey, si Parlamento a dicidi, si e pueblo ta wardando, pakico no ta tuma accion anto?
Oduber a finaliza bisando: “Pueblo ta mira y pueblo ta conta.”
