Parlamentario Dangui Oduber cu serie di pregunta
ORANJESTAD (AAN): Parlamentario Dangui Oduber di MEP, a tuma nota cu minister Wever a anuncia recientemente cu e mester bay cambia e destaho publico di e diseño di e Proyecto Agripark y haci esaki uno internacional pasobra localmente ningun compania por haci esaki.
“Nos a keda masha asombra cu e anuncio aki y a base di esaki nos a dirigi varios preguntanan na minister Geoffrey Wever. Nos a papia cu varios cunukero y nan a expresa nan desapunto y preocupacion pa e plannan di minister Wever. Nan ta sinti cu esaki ta un setup pa laga inversionistanan di afor bin tuma over y dicta riba tur cunukero local. “
Oduber a sigui: “Nos ta spera cu nos di parlamento por haya claridad riba e plannan di minister Wever y ta spera di berdad cu e intencion no ta pa elimina tur nos cunukeronan local. Tin tur indicacion cu esey ta loke minister Wever kier logra cual sigur lo ta algo totalmente condenabel. E ta un falta di respet caba e manera con nos cunukeronan local ta worde trata. Nos lo keda vigila e situacion aki di cerca pasobra nos tey pa defende interes di cunukeronan local y no sirbi interes di inversionistanan miyonario cu kier bin kita derecho di nos propio hendenan.
E preguntanan: Esaki ta e preguntanan haci na Ministro Wever:
(1). Si nos sigui noticianan tocante e Proyecto Agripark, e impresion ta wordo crea cu ta creando un diseño pa exclui cunukeronan local for di e Proyecto Agripark. Mayoria di cunukero/agricultor local ta na fabor of contra e proyecto aki?
(2). Si mayoria cunukero no ta na fabor di e proyecto pakico Minister Wever ta insisti pa sigui cu un proyecto sin sosten di e mes grupo cu e proyecto ta destina pa tin beneficio?
(3). Minister Wever a bisa publicamente cu "Aruba no tin experticio" pa diseña e kassen, y pa e motibo mester habri e destaho internacionalmente. A base di kico Minister Weyer a haci e expresion aki?
(4). Dicon Minister Wever ta subestima e capacidad di nos mes cunukeronan y tecniconan local cu ya a demostra cu Kassen local por funciona na Aruba?
(5). Ministro Wever por indica ken a determina oficialmente cu Aruba no tin e experticio, y unda e estudio di esaki ta? Minister Wever por comparti e estudio aki cu Parlamento di Aruba?
(6). Minister Wever por comparti cu parlamento di Aruba e estudio di impacto Ambiental prepara pa e Agripark?
(7). NVWA na Hulanda ta adverti cu por tin dañonan Ambiental causa pa kimiconan cu mester wordo uza? Minister Wever por duna splicacion di e dañonan aki?
(8). Hulanda mes a experiencia dañonan ambiental grave relaciona cu uzo di pesticidanan y fertilisantenan. Aruba ta un Isla chikito, cu posnan y awa ta conecta directamente cu e lama. Minister por indica: cua tipo di kimico ta planifica pa usa den e kassen di Agripark?
(9). Ki regulacion ambiental of ley ta wordo implementa pa preveni contaminacion di awa, tera y aire?
(10). E material pa e kassen lo wordo getest contra e nivel halto di saltpeter y biento na Aruba?
(11). Kico lo ta e plan di mantencion y ken lo cubri e gasto continuo di mantencion den futuro?
(12). Kico Ministro Wever ta haciendo concretamente pa incentiva y yuda cunukeronan local amplia nan propio Kassen enbes di bin cu un Proyecto monopolio cu lo caba cu cunukeronan local?
(13). Cual ta e beneficionan concreto cu e cunukeronan local lo haya, fuera di promesa di participacion?
(14). Ki garantia lo tin cu e Agripark no ta bay bira un proyecto cu lo beneficia mas companianan stranhero cu no ta inverti den comunidad local?
(15). Minister Wever ta papia hopi di ‘sostenibilidad’, pero sin un base di consenso, sin un estudio di impacto, y sin transparencia di costo of modelo di operacion, ki parti di esaki ta sostenibel?
(16). Ministro por entrega na Parlamento e plan financiero y operacional completo, inclui ken lo maneha e park y ki tipo di contract lo wordo firma?
