Parlamentario Evelyn Wever-Croes tocante minister plenipotenciario:
ORANJESTAD (AAN): Dialuna ultimo den conferencia di prensa di Fraccion di MEP, Parlamentario Evelyn Wever-Croes a menciona cu su Fraccion a entrega un carta na Prome Minister Mike Eman pidiendo pa duna claridad y transparencia riba e decisionnan pa no nombra un minister plenitotenciaro na Hulanda.
Un di e preguntanan menciona den e carta na Prome Minister tawata tocante e cifranan financiero cu Minister Gerlien Croes a menciona. Esakinan, segun e parlamentario no ta corecto y ta duna un impresion ekiboca, mirando e hecho cu no ta tur aña ta bay ripiti gastonan por ehempel, riba un auto nobo, pa e minister plenipotenciaro na Hulanda. Tambe a puntra dicon ta bay inverti miyones den e edificio di Arubahuis na Hulanda y no tin un minister plenipotenciario eynan.
Esakinan, segun Parlamentario Wever-Croes, ta desicionnan y exprecionnan contradictorio y falta di transparencia di Gobierno AVP-Futuro. Y esaki definitivamente no ta e manera pa atende cu relacionnan den Reino.
“MEP den Gobierno bek, lo percura pa atende nos relacionnan den Reino na un manera responsabel y transparente. Ta importante pa Aruba tin su representacion na Hulanda pa evita hustamente loke ta pasando awo cu Hulanda ta bin impone y exigi entre otro den e tema di ley di Reino Hofa. Nos ta convenci cu nos tin mester di minister plenipotenciaro na Hulanda. Señor Ady Thijsen a haci un tremendo trabou como minister plenipotenciario den mantene Aruba presente, den duna Aruba e atencion na Den Haag pa asina nan por sa kico ta pasando na Aruba y pa nan comprende nos miho”, Parlamentario Evelyn Wever-Croes a conclui.
