Parlamentario Edgard Vrolijk:
ORANJESTAD (AAN): Mirando e reaccionnan riba Mike Eman den su ultimo locura mi mester a bin combersa cu pueblo. E motibo di esaki ta cu nos mester tuma Mike Eman na serio y no haci comosifuera ta un joke, paso Mike Eman ta mas peligroso y devastador cu un boa ta pa nos fauna!
Nos tin di ta consciente cu Mike Eman ta un peliger pa Aruba y cu e lo ta mas devastador ainda pa nos pais y pa futuro di nos isla, si pueblo comete e eror di ripiti e historia di 2009, na unda Mike Eman a sa di manipula pueblo pa yega na poder. Mike Eman ta haciendo mescos cu na 2009 pa bolbe laga pueblo scoge, pa e por haya e mandato di pueblo pa un bes mas bin masacra nos finansas y nos economia. Danki na su manipulacion na 2009 awe nos pueblo ta sinta cu e castigo pa paga su MEGAdebe crea, sin conta e interes halto di e proyectonan PPP.
Mike Eman a devasta finansas di Aruba
Mike Eman a priminti pueblo na 2009 cu e lo drecha finansas (GDP di 43% na 2009) y cu e lo reduci Aruba su debe di Afl. 2.2 biyon cu a ser acumula den 23 aña. Pero Mike Eman y AVP sin niun tiki consenshi, mescos cu e boa ta haci cu nos fauna, a endeuda e pais cu Afl. 2.3 biyon acerca den solamente 8 aña y pone nos GDP yega 90%.
E masacre di nos finansas door di Mike Eman y partido AVP a causa cu Aruba no tabatin buffer pa wanta ningun acontecimento manera a pasa cu e pandemia. E unico cu Mike Eman y AVP a haci ta aumenta nos pago di interes cu tabata rond Afl. 100 miyon pa aña y a manda esaki te na Afl. 300 miyon pa aña, cual ta 20% di nos presupuesto.
Pues, 20% di nos entrada ta bay na paga 1 solo debe, e MEGAdebe di Mike Eman. Y ken bo ta kere mester pag’e? Banda di esaki Mike Eman y AVP a bin cu proyectonan PPP cu nan no a presupuesta y cu awo pueblo ta pagando Afl. 100 miyon extra banda di e interes halto na e proyectonan aki cu e consecuencia cu inversion den nos pais ta casi imposibel!
Aruba mester percura pa bolter Mike Eman pa semper
A yega momento pa pueblo, cu tin e instrumento cu yama derecho di voto dia di eleccion, pa bolter Mike Eman y su partido AVP pa hamas nan bolbe haya oportunidad pa dirigi nos pais! Mike Eman y AVP lo bin cu mas hamber cu e boa pa come tur locual Gabinete Wever -Croes I y II conhunto cu nos cuidanonan a logra construi despues di e disaster di Mike Eman y e pandemia di COVID-19. Mike Eman y AVP ta manera un boa cu ta sinta warda riba su presa, esta pa warda pueblo duna nan un mandato. Na 2017 y 2021 ya caba pueblo a honra Mike Eman pa ta den Parlamento y nos por conclui cu ta na poder e kier bin bek.
Na 2017 e la opta pa no drenta Parlamento pero keda cera den su penthouse ta skirbi buki. Na 2021 el a drenta Parlamento pero ta cobrando sin traha. Mike Eman no tin e interes di Aruba na pecho pero solamente SU propio beneficio y interes. Pesey nos mester preveni pa Mike Eman y AVP bin na poder y masacra un biaha mas nos finansas, nos economia y e futuro di nos yuinan.
A yega ora di bolter Mike Eman y AVP leu di politica y ta pueblo tin esaki den nan man. Door di vota consciente nos por manda Mike Eman cas y asina pone punto final den su buki di politica.
