Parlamentario Fraccion di MEP, Ricky Hoek:
ORANJESTAD (AAN): Un topico di suma importancia den e periodo actual ta e bishita di Het College Aruba financieel toezicht (CAft) na Aruba, cu a tuma luga riba dia diabierna 1 di Maart ultimo.
Den reaccion riba esaki, e Parlamentario di Fraccion di MEP, Ricky Hoek, a manifesta su satisfaccion cu e reunion a resulta di un forma sumamente positivo.
E reunion cu CAft ta indica claramente e progreso economico cu Aruba ta logrando. Nos ta mira cu e maneho financiero di Aruba ta na un rumbo positivo, indicando un compromiso robusto cu ta bay den direccion di un recuperacion economico duradero y sostenibel. Ta evidente cu Aruba ta cumpli cu su debernan, tanto localmente como internacionalmente.
Hoek a enfatisa cu CAft a identifica algun area unda tin oportunidad pa mehora. Esey ta algo cu Gobierno di Aruba y Parlamento ya ta conoci cu ne caba, y ta enfoca riba nan. Sinembargo, e evaluacion general ta indica un panorama positivo pa e situacion financiero di Aruba.
E parlamentario a expresa agradecimento for di Fraccion di MEP pa e sosten pa e trabao bon haci pa Gabinete Wever Croes II den e esfuerso pa recupera e economia di Aruba.
Ademas, el a reconoce e profesionalismo di e expertonan den e sector financiero, kendenan a demostra nan conocemento, disciplina, y experiencia pa dirigi Aruba na un rumbo nobo, cual lo resulta den un resultado financiero structural y positivo.
