Mike Eman ta manipula cu data di finansas di Aruba na un manera inadecua

Parlamentario Setty Christiaans-Yarzagaray:

ORANJESTAD (AAN): Parlamentario Setty Christiaans-Yarzagaray, di fraccion di MEP, a tuma nota di reaccion di gobierno di Aruba den medionan di comunicacion y rednan social riba informacionnan publica pa Sr. Mike Eman.

            Christiaans-Yarzagaray a bisa cu Sr. Eman ta uza informacionnan di un manera cu semper ta beneficioso p’e. "Ami ta hay’e importante pa coregi e datonan cu ta wordo uza y splica na un forma incorecto,” el a declara.

            El a sigui bisa cu data por wordo interpreta di diferente manera na diferente momento. Christiaans-Yarzagaray a enfatisa cu ta importante siña lesa y analisa e informacionnan na un forma mas actualisa posibel of splica e tempo cu esaki a wordo registra.

            E parlamentario a indica cu Sr. Eman a uza un tabel di un rapportahe cu yama ‘Uitvoeringsrapportage’ of URK. Esaki ta un rapport publica door di Departamento di Finansas desde cu Aruba tin un CAft pa mantene un supervision riba e maneho financiero di Aruba. Desde e momento ey, gobierno di Aruba ta obliga pa informa CAft y Parlamento cu un rapport regular.

            Christiaans-Yarzagaray a cuestiona cu Parlamentario Eman a uza informacion di 2023 solamente di e prome kwartaal, pa mustra cu Pais Aruba no ta pagando su debe y no ta logrando e surplus financiero segun e. El a agrega cu e mesun tabel aki pero den e rapport mas actual cu ta kwartaal 2 di 2024, ta mustra e estadisticanan di 2017 te cu 2024, caminda ta cla cu e debe di Aruba di 2022 tabata 5.716 miyon, na 2023 esaki a baha pa 5.563 miyon, y ta baha mas ainda na 5.439 miyon den 2024.

El a enfatisa cu ta importante uza data recien y no solamente un momento selectivo pa refleha e realidad cu sr. Eman kier refleha si no mester uza data actualisa y mustra e realidad actual di Aruba.

            Christiaans-Yarzagaray conclui cu Eman di manipula informacion pa su beneficio. "Mi ta pidi pa lesadonan di data pa uza e informacion mas actualisa posibel pa un imagen mas balansa y real," el a remarca.

            Ademas, el a menciona cu e tabel aki ta accesibel pa publico y pa pueblo, cu tambe por consulta Parlamento pa haya claridad riba e situacion financiero di e pais. Of por uza e website di Gobierno.aw of Overheid.aw pa consulta e rapportnan aki pa informacion corecto y actual. “Ta importante pa pueblo ta bon informa y pa no wordo gaña pa politiconan cu no ta uza e informacion debidamente,” Christiaans-Yarzagaray a declara.

            Segun Christiaans-Yarzagaray, e tabel ta confirma cu Pais Aruba ta disminui su debe, cu fin di logra un finansa publico sostenibel y duradero pero tambe cumpliendo cu normanan di CAft.