Mike Eman cu solucionnan semper ta carga un prijskaartje cu simplemente pais no por carga

Parlamentario Marco Berlis (MEP):

ORANJESTAD (AAN):   Den un rueda di prensa algun dia pasa Parlamentario Mike Eman a subraya cu e la papia cu Gobernador di Aruba riba su plan di Sociaal Cultureel Planbureau (SCP). Den su reunion cu Gobernador e la conta su storia con SCP lo bay “garantisa cu e realidad economico ta keda refleha den estudionan cu ta identifica e retonan socio economico den nos pais.”

            Ademas Mike ta propone pa transforma e debe den un fondo di inversion di Afl. 900 miyon pa Aruba. Mi pregunta na Mike Eman ta: Dicon bo no a bay Hulanda pa papia con bo por cambia e megadebe di Afl. 2.2 biyon den un fondo di inversion? Acaso bo no sa cu esaki lo haci cu nos debe nacional ta baha te na 48% di nos GDP? Dicon bo no ta propone esey Mike? Claro cu e no ta bay haci’e pasobra Mike ta hungando un wega politica cu Afl. 900 miyon cu a alimenta y sostene famianan y negoshinan durante pandemia. Mike Eman kier pa pueblo kere cu e ta e “salbador” di Aruba, pero enberdad tur hende sa cu e ta e “destructor” di nos pais. 

Sociaal Cultureel Planbureau lo produci estudionan no un solucion!

            Parlamentario Mike Eman a bay Hulanda cerca  mr. Donner, Minister di estado di Hulanda, kende a bisa Parlamentario Mike Eman cu su plan di SCP ta “demasiado caro” y cu mester masha hopi experto pa e SCP. Segun minister Donner SCP ta pagabel pa un pais hopi mas grandi y cu tin forma pa financia esaki. Parlamentario Mike Eman ta conoci pa NO spanta pe prijskaartje, pasobra ta pueblo ta paga toch. Den otro palabra, minister Donner di Hulanda a bisa Mike: bo plan ta irrealistico y mucho caro. Ademas Mike Eman no ta papiando di un solucion, e ta papiando di “garantisa cu e realidad economico ta keda refleha den estudionan cu ta identifica e retonan socio economico den nos pais.” Scucha Mike Eman bon, e ta papia di estudionan, no di solucion!

            Despues di mester paga decenas di miyones pa e SCP ainda lo mester inverti miyones pa realisa y consehonan di e estudionan. Mike ta manera un pauwies cu ta dispuesto pa pronkia cu un SCP cu no ta bay produci solucion. Sinembargo ora cu Algemene Rekenkamer, Banco Central y CBS a adverti riba e deficitnan catastrofico, mal maneho y pobresa cu Mike Eman a crea cu e megadebe, Mike a coy e rapportnan scondenan den su lachi.

            Esaki pues pueblo, ta Mike Eman, un Parlamentario cu no gusta traha cu rekensom ni cu data, cu a sconde data di CBS cu a saca un rapport riba pobresa di nos pais na 2017, cu a sconde un rapport di Algemene Rekenkamer (ARA) di e rapport catastrofico “Bo Aruba” di mal maneho di mas di Afl. 1.6 biyon”, cu a sconde pa pueblo e rapport di CAft y CBA cu a declara cu Mike Eman a endeuda pais Aruba cu mas di 90% di nos GDP y cu awe kier sigui endeuda pueblo cu mentira y engaño. Kico SCP ta bay haci pa pueblo? Net net nada! 

Mike Eman bromando cu un plan irrealistico y sin un acuerdo cu Hulanda

            Mike Eman a core bay Hulanda cu un “supuesto plan” pa yuda crea un fondo di desaroyo pa Aruba, di cual lo por inverti Afl. 900 miyon bek den proyectonan. Mike Eman ta papiando atrobe di un solucion cu simplemente no tin niun garantia y riba cual no tin un acuerdo riba papel cu Hulanda.

            Esaki ta otro promesa y strategia di “politica comun” di Parlamentario Mike Eman. Ora bo scucha Mike bon, e kier inverti atrobe den embeyece barionan y infrastructura. Nada contra esey, pero ke hubo di drecha nos finansas Mike, cu ba laga na werki? Bo tin un plan pa cu esey? Ke hubo di nos grandinan cual ba kita tur beneficio y a empobrece cu mas di Afl. 24.000 pa aña cu bo medidanan Mike? Bo tin un plan pa esey? Ke hubo e momento cu ba grita cu bo a haci e debe cu orguyo pa nos tur bay pag’e pa futuro Mike? Bo tin un plan pa esey? Ke hubo di e corupcion di bo ex-ministernan cu a bay cera y a wordo condena pa corupcion? Bo tin un plan pa esey? Claro cu no! Pesey Mike Eman su slogan politico ta: “Laga Aruba sin fondo y den fondo!”