Parlamentario Shailiny Tromp-Lee:
ORANJESTAD (AAN): Ta hopi remarcabel cu durante di reunion publico di awe 24 di april 2023 partido AVP, por cierto no completo, ta bini den parlamento pa menciona palabranan manera: ‘esnan mas vulnerabel’, ‘pobresa penoso’, ‘interes general’, ‘necesidadnan basico’ y te hasta insinua cu nos tin interes den ‘kill the messenger’. Realidad ta cu echonan y su actitud mes ta ‘kill e messenger’.
Gabinete Eman I-II tawata e pandemia mas dañino den historia di pais Aruba
Echonan manera shownan di reapertura di refineria cu a costa pueblo hopi placa sin ningun resultado, organisa concierto y conferencia innecesario y sin balor agrega, regalamento di terenonan na nan Friends and Family, basha firma pa PPP-Projecten sin a percura pa e fondonan necesario pa paganan bek sin papia mes di nan impacto financiero cu nan lo tin pa mas cu 20 aña riba nos finansas.
Echonan manera e crisis social cu nan a ocaciona, mega debe cu nan a crea cu ta manera un lus rond nos garganta. Sigur Pueblo no por lubida e proyectonan di Bo Bario. Proyectonan cu a costa pueblo 1,6 biyon florin, caminda e resultado di e investigacion di ARA a conclui cu hopi eror a wordo constata den tur e proyectonan “bunita” di AVP.
Segun e rapport di ARA ni Gobierno di AVP ni Parlamento di e tempo ey, tabata por a domina ni controla e proyectonan. Dicon? Pasobra e proyectonan no tabatin plan di ehecucion, no tabatin un presupuesto fiha, proyectonan no tabata duradero, Gobierno no tabata duna cuenta, no a tene destaho publico den tur caso y asina mi por sigui menciona. Door di falta di transparencia y e situacion di informacion incompleto, placa por a keda uza pa otro meta, tabatin espacio pa malgastamento di placa, gobierno por a inverti den proyectonan no duradero y por a gasta placa pa otro meta mirando cu metanan concreto no a keda fiha inicialmente.
Pesey AVP por a haci fiesta y nan lider tabata pasa diasabra ta corta yerbe na casnan inhabita, anochi ta core rond di veld bisti cu sapato, tabata pasa come comcomber cu forki na cas di hende y na lugar di sinta traha den Cocolishi tabata tuma pueblo haci mientras tabata manda nos pais den un avismo financiero nunca antes bisto. Pesey mes pueblo no por lag’e maneha e pais aki nunca mas.
Manipulacion ta Mike Eman su talento
Echonan di falta di presencia na Parlamento, caminda no ta asisti na trabou, comisionnan y demas reunionnan. Echonan cu ta demostra cu e ta para pa beneficio personal y partidista, lagando beneficio y bienestar general un banda. Lagando un persona condena como miembro di parlamento, atachando e instituto gravemente.
Algo cu nos tur mester condena. Awe Mike Eman tin e corahe pa sali papia purbando di manipula pueblo cu ‘palabranan bunita’ y ‘palabranan emocional’. Pero si nos ta sincero cu otro awe, e unico Gabinete cu enberdad kier proteha e ciudadano vulnerabel, cu ta atende en berdad cu e retonan di nos pais, cu ta atende cu e retonan di nos ciudadanonan, ta e Gobierno aki.
Y no compronde mi robes cosnan ta dificil! Costo di bida TA caro! Pero no ta na Aruba so. Ta na tur parti di mundo. Pero esaki no ta nifica cu nos no ta busca forma pa remedia esakinan, paso nos ta! Pueblo sea critico y no laga Mike Eman tuma boso haci. Papia bunita sin duna contenido a para bira e trade mark di Mike Eman. Pasobra nos tur sa cu loke sigur e falta ta curashi y determinacion, sin lubida e habilidad y responsabilidad pa maneha su fraccion y partido debidamente, algo cu ultimo dianan nos ta scucha di miembro y ex-mienbro di nan propio Fraccion.
Pregunta ta bira: Si bo no por ni maneha bo fraccion, ni bo partido responsablemente, a ocaciona un desaster social y financiero pa bo pais como Minister Presidente, ta con bo ta verwacht cu pueblo ta bay duna bo nan confiansa un biaha mas?
