Partido MEP asombra
ORANJESTAD (AAN): Despues cu diabierna ultimo, Parlamentario Marisol Lopez-Tromp a haya un carta di Ministerio Publico na unda nan ta notific’e cu e ya no ta un sospechoso di caso Kukwisa, Marisol Lopez-Tromp por fin a haya un alivio grandi den su stoma y a kibra silencio y a cuminsa tira lodo riba Lider di Partido MEP, Evelyn Wever-Croes.
Marisol despues di e carta ey di Ministerio Publico, porfin a cuminsa sinti un alivio grandi despues di 3 aña cu e tawata un sospechoso di Ministerio Publico riba iregularidadnan den otorgamento di terenonan durante e periodo cu e tawata e minister encarga cu infrastructura.
Y e alivio aki cu porfin a drenta curpa di Marisol Lopez-Tromp a causa cu señora Lopez-Tromp a cuminsa tira lodo pero Marisol a lubida di bisa cu e tawata un sospechoso pa 3 aña y el a tene e informacion aki hopi secreto.
Marisol a warda te dia cu Ministerio Publico a yam’e aden como un sospechoso y a sinta 7 ora largo pa duna cuenta di su maneho. Marisol a haya suficiente tempo entre e dia cu el a bira sospechoso 3 aña pasa y e dia cu el a wordo yama, pa prepara. Esaki pa Marisol ta integridad?
