Parlamentario Marco Berlis (MEP)
ORANJESTAD (AAN): Algun dia pasa Mike Eman a sali papia di e pensioen di nos bieunan. Mike Eman a denuncia e situacion di nos grandinan y cu lo mester a subi e pensioen urgentemente. Ainda pueblo por corda con den e dianan cu a pasa Mike Eman a papia di pobresa, e mesun draaiboek di semper, y ora cu finalmente el a haya e reunion publico pa trata esaki, el a sali cana bay 6’or di atardi caba, pa bay su condominium na Marisol Building y sosega curpa. Segun Dowers y Eman ta un entiero nan a bay.
E reunion a caba 12:30am, for di ki dia un entiero ta mas di 7 ora largo? Nan no por a bay entiero bin bek e reunion publico di pobresa? Asina nos ta wak cuanto importancia Mike Eman y su Old Boys a duna reunion di pobresa.
Mike Eman a caba cu pensionadonan den su gobernacion di 2009-2017
- Mike Eman a haci tur pensionado perde nan bashi premie, gelijkbedrag y tambe back to school premie. Haciendo esaki Mike Eman a kita miles di florin pa aña for di pensionadonan cu awor segun Mike Eman ta bibando den pobresa! Ta kende a kita miles di florin aki for di nan entrada? Ta kende a kita pan for di mesa y a haci cu nan a perde cientos di florin pa luna?
- Middelloon regeling a mata e opbouw di pensioen drasticamente, y pensionadonan a bay atras cu mas cu 1000 florin pa luna. Unda antes pensionadonan tabata haya 70% di nan ultimo salario, Mike Eman a calcula un promedio di nan salario durante nan carera y duna nan 70% riba esey, masacrando pensionadonan sin misericordia. Pensionadonan a wordo masacra duramente bao maneho di Mike Eman, cu awor kier hunga e “heroe comun!”
- Mike Eman a subi edad di pensioen di 60 pa 65 aña, asina kitando un biaha mas 5 aña di pensioen for di nos grandinan y ta forsanan traha den nan biehes sin misericordia. Ademas, si nos conta 5 aña di pensioen mes cu nos grandinan a perde na mil florin, Mike Eman a kita mas di 60mil florin for di nan! Acaso Mike Eman ta kere cu pensionadonan lo lubida su traicion?
Sin pensa dos biaha Mike Eman a traiciona nos pensionadonan cu yen pretexto y awe tin e curashi di papia di “e bon comun?” Ora cu Mike Eman e kita miles florin di bashi premie, gelijkbedrag, back to school premie, suta nos grandinan cu un middelloon inhusto y asina destrui nan entrada, masacrando nan bienestar grandemente, awo ainda bo tin e cuero di cara di bisa cu bo ta bay “redobla” nan pensioen?
E unico cos cu Mike Eman tabata bon den dje ta pa “redobla nos debe” nacional unda el a hipoteca nos pais na casi 90% di nos GDP. Nos pensionadonan a haya un “masacre comun” di Mike Eman y a causa e desgracia di nos grandinan den tempo di bonansa.
Mike a mata e ciudadano cu AOV individualisering
Mike Eman a kita e ley den cual un pareha tabata paga belasting, pero solamente esun cu tabata gana mas tabata paga y e otro tabata haya su belasting bek. Si por ehempel e pareha tabata paga 6000fl y 4000fl na belasting por ehempel, cu e areglo bieu nan tabata haya e 4000fl bek.
Cu AOV individualisering Mike Eman a kita esaki y e mesun pareha aki awor mester paga e 10mil florin completo sin haya nada bek. Asina Mike Eman a caba cu e clase medio, sin cu tabata tin un pandemia, sin un crisis economico global, sin un guera na Ukraina, y sin petroleo halto!
Ta Mike Eman mes ta e pandemia, ta e a destrui esnan vulnerabel y nos pensionadonan. Awe Mike Eman kier hunga e heroe y kier gaña cu e lo redobla pensioen. Bo lo redobla e pensioen mescos cu bo a kita e BBO Mike? Gaña pueblo, manipula nos bieunan, ta loke bo famoso “bon comun” ta siña bo hendenan? Mike Eman a suta nos pensionadonan cu medida y a corta nan entrada y beneficionan completamente y awo e ta preocupa cu nan pobresa? Sr.Mike Eman, pueblo hamas lo lubida bo traicion y e realidad cu nan mester a biba bao di bo gobernacion! Nunca mas AVP y mucho menos Mike Eman!
