Tin ningun plan pa awor pa bay otro partido
- Pa hobennan den politica loke ta importante ta contenido di su partido
- E no por bay baha su principionan como persona pa loke ta pasando
ORANJESTAD (AAN): Despues di un par di siman cu a cuminza specula riba e futuro di parlamentario Gerlien Croes di AVP, e contesta cu pueblo tabata spera a yega Dialuna den oranan di merdia.
Despues di hopi reunion, consulta, y deliberacion, Gerlien a dicidi cu e ta bandona AVP. Pues Aruba a haya un Parlamentario independiente mas.
Haciendo un declaracion na e porta principal di Parlamento, Gerlien Croes a mustra cu tabata net 6 aña pasa, esta na 19 Mei 2017 cu el a anuncia pa prome biaha cu e ta bay riba lista di Partido Politico. Y awor riba 15 di Mei 2017 e ta anuncia su retiro di Partido AVP. E dama hoben a indica cu tabatin hopi desaroyo den ultimo 6 aña aki, cu e no “ta haya su mes mas” den e vision, pensamento, y e forma di hiba politica cu AVP ta escogiendo pa tin.
El a admiti cu a reuni cu lidernan y a purba pa mira con por papia riba cambionan drastico cu lo por refleha no solamente na comunidad, pero por laga nos tambe como hobennan sinti nos mes tambe cu tin espacio pa un otro bos y otro pensamento den partido.
“No ta desconoci cu tin un division hopi grandi den pensamento, y kizas generacionnan, hobennan y tambe ex-coleganan cu tabatin hopi aña den partido, tin diferencia hopi grandi den forma di ‘wak topiconan’, den forma di ‘wak cierto manera di hiba politica’, y esaki a sigui keda crece e ultimo seis añanan.”
El a sigui bisa: “Lamentablemente nos no a logra yega na otro, y mi persona no tabata convenci cu cambionan drastico por tuma lugar por lo pronto, y no a kedami nada mas pa tuma un decision na final pa kico mi ta kere ta mihor pa haci pa mi futuro como politico na Aruba.”
El a splica cu tin aworaki hopi reto pa soluciona na Aruba, pero e ta kere cu pueblo tin di realiza, cu ora bo drenta arena politico como hoben cu un pensamento diferente, cu bo tin di laga los un rato di culpa kende tabata fout, y kende ta haciendo lo incorecto, pero tambe purba enfoca e momento aki con ta bay purba soluciona problema y retonan cu e isla tin, pero tambe laga un otro bos resona den politica na Aruba.
Gerlien a menciona cu el a drenta politica cu su ‘principionan como persona’, y claro e no kier bay perde esaki nunca. Y den e conflicto cu AVP, esey ta loke el a keda wanta su mes na dje! Pues e no por atacha su principionan.
Pues loke a pasa den AVP pa Gerlien, “... tabata situacionnan cu no tabata aceptable mas.”
E ta gradici tur esnan cu a forma parti di e deliberacion- y combersacionnan ultimo tres simannan, e ta gradici nan comprension, y tambe na pueblo, pasobra e ta convenci cu Aruba por kere ainda cu e isla por tin un aire fresco den politica. Aruba a demostra den resultado di eleccion di a duna sosten grandemente na hobennan. Na 2021 tambe tabatin cambio riba lista, unda a duna hobennan un puesto mas prominente riba e isla. Pero no djis e imagen di duna e hoben politico un lugar prominente riba lista ta bal, sino tambe e contenido y pensamento diferente di e hoben politico cu mester wordo respeta.
E ultimo aki no tabata e sentimento cu Gerlien tabatin mas bao di AVP, y a ked’e nada otro pa hunto cu varios otro persona (incluyendo famia) a yega na mesun conclusion pa e bandona e Partido Berde, y sigui awor como Parlamentario Independiente.
El a desmenti di tin cualkier plan pa subi otro lista of crea uno pa awor. Unico trabao cu e tin awor ta pa sigui representa pueblo den Parlamento. E ta lamenta cu Aruba a wordo dividi hopi aña largo debi na politica, y tambe division di ‘generacion bieu’ y ‘generacion nobo’, etc.
