Parlamentario Rocco Tjon:
ORANJESTAD (AAN): Diahuebs durante reunion publico caminda a trata retiro di ministernan di Gabinete Wever-Croes II y nombracion di Gabinete AVP-Futuro, por a tuma nota di un Mike de Meza hopi vengativo, frustra y yena cu odio.
DISCURSO DI PARLAMENTARIONAN
Durante e reunion aki tur parlamentario di tur fraccion a hiba discursonan positivo y elocuente. Sr. Heyliger a elogia Minister president pa trabounan cu el a haci riba tereno di posiciona e hende muher mas den nos comunidad. Sra. Arends-Reyes a gradici ful gabinete saliente pa e trabounan desplega na bienestar di pais Aruba. Ademas, Sr. Bermudez y Sr. Goeloe a gradici pero alabes a boga pa un politica nobo den Parlamento, uno di cooperacion y uno constructivo na bienestar di pais Aruba.
DISCURSO MIKE DE MEZA
Despues di e discursonan di varios miembro di Parlamento sr. Mike de Meza a hiba palabra y no solamente insulta e ministernan saliente, pero tambe a tuma e oportunidad pa menasa cu nan lo bay investiga y persigui tur ex-minister unabes cu AVP yega na mando y cu esaki lo cuminsa dialuna benidero.
Claramente, de Meza no tin ningun interes den bon gobernacion y mucho menos un trato di respet pa otro coleganan. Mientras cu e ta hiba su discurso nos por a tuma nota di e caranan di miembronan di Parlamento di Futuro y AVP cu hopi berguensa y decepciona. Mike de Meza ta haci como si fuera e hecho cu e no a pasa screening ta culpa di ful mundo menos di dje. Ta danki na su propio comportacion pa loke ta trata "belasting" awe e no por a pasa screening!
