Parlamentario Edgard Vrolijk (MEP):
ORANJESTAD (AAN): Dia 31 di mei 2017 Parlamento di Aruba cu su mayoria (lesa AVP) a aproba e iniciativa di Ley di Screening di Minister di Marlon Sneek. Un ley cu ora a bay pa conseho na 2015 a haya un bon dictum pero e ley cu a ser aproba no tabata esun cu a conseha riba pues tabatin ingrijpende wijzigingen y asina mes Gobierno di AVP a manda esaki pa ser ractifica door di Gobernador.
Gobernador na su turno a opta pa mand’e pa Raad van Advies pa conseho y unda cu a conseha Gobernador pa no ractifica esaki paso e ta contra constitucion y tabata carece di elementonan di integridad, transparencia y indepencia.
Ley a ser cambia cu 7 nota di cambio
E iniciador di e ley den e caso aki sr Marlon Sneek durante tratamento a entrega no menos cu 7 nota di cambio. E notanan di cambio aki a crea cambionan drastico den e ley cu a pone cu Gobernador mester a keda sin ractifica esaki.
Kico ta e cambionan cu Marlon Sneek a haci?
- A haci e circulo familiar mas compacto y unda si bo tin yiu mayor di edad cu no ta biba na cas mas no mester duna cuenta y esaki ta contra e PEP cu ta ser usa na entre otro banconan. Esaki sigur tin consecuencia pa mas articulo di ley cu mester verval paso e yiu aki lo no mester duna mas informacion y no lo raporta si tin conflicto di interes y por ehempel por haci negoshi trankilamente cu e tata y hasta kisas por tuma over negoshi di e tata y traha cu e tata.
- Ta añadi cu bo por tin otro nevenfuncties si bo ta minister pues por tin bo consultancy y por keda strica placa na banda trankilamente sin duna cuenta.
- Ta kita e screennan riba ongebruikelijke transacties pues si bo haya $50.000 y banco red flag esaki, pa minister no mester screen esaki.
- Examen medico ta ser kita.
- Ta cambia justitieel onderzoek pa justitieel antecedenten onderzoek pues ta wak si bo a yega di haya entre otro boet so pero si bo ta sospechoso of a ser condena pa kisas labamento di placa esaki no ta conta pabo screening. E cambio di e tipo di investigacion hudicial aki ta haci cu un sospechoso prime y durante su periodo of si ta condena por bira of keda un minister henter su periodo trankilamente.
- Screening riba SVB no ta parti mas di screening pues si bo ta doño di trabao y ni tabata paga prima di trahador esaki por sigui hacie paso no ta ser gescreen mas.
- Ta cay afo unda cu famianan cercano no mester duna cuenta mas si nan tin zakkelijke belangen cu por tin conflicto di interes.
- Lo mas tristo cu e ley aki si a ractifike por a cambie cu 2/3 di parlamento cu ta hasta contra nos constitucion ora ta trata un ley.
Ultimo aki den un conferencia di prensa pafo di Fort Zoutman e dos formadornan, esta Sr. Mike Eman y Sra. Gerlien Croes a indica cu nan kier bay cambia e ley di screening. Mirando e cambionan drastico cu nan kier a haci na 2017 pa asina “versoepel” e screening pa nan por pas’e sin problema, ta bon pa e formadornan bin splica ki nan ta desea di cambia pa pueblo sa. Nan kier bin kita e elemento di “screening” di berdad y djis tene un ley bashi y gaña pueblo cu nan ta wordo gescreen di berdad? Pueblo ta keda pendiente pa nan splicacion riba nan cambionan.
