ORANJESTAD (AAN): Otmar Oduber, siman pasa a anuncia cu e ta bolbe politica activo y lo ta liderando e partido oranje, PPA.
Comentando con e proceso aki a bay el a bisa cu asina gobierno a cay el a inicia combersacionnan cu PPA, cual ta un partido cu no solamente a logra 15 asiento haciendo di dje e partido cu mas sosten a yega di logra di pueblo, ademas e ta e partido cu mas a goberna tras di otro pa casi 20 aña. Motibo di esakinan ta pasobra e partido a unifica e pueblo.
Esey ta e meta di Otmar, el a uni na PPA pa traha y hiba e partido na e gloria di Juancho Enrique Irausquin, unificando pueblo un biaha mas.
Ademas, ideologianan turistico, economico y vision di Oduber ta similar na esunnan cu Juancho Irausquin tabatin. E gran lider aki tabatin e honor di pone e prome hotel na Palm Beach y awe Otmar tin e honor pa habri e prome hotel na San Nicolas pa pueblo di Aruba.
E union cu tabatin antes, unda politiconan tabata traha hunto, manera omo di Otmar, Dolfi Oduber, cu tabata diputado e tempo ey di PPA, hunto cu Sr. Betico Croes y Chomy Yarzagaray di AVP a uni y hiba un lucha cu a cuminsa cu Shon A y Henny, ta algo cu mester wordo papia habri.
“Nos no tin nada di kita di e logronan cu tabatin di nos politiconan anterior, al contrario, nos mester gara esey y ban bek na unifica e pueblo aki. Nos no por pidi e pueblo pa union, pa no bringa pa politica, mientras e politiconan ta lastra y ataca otro manera cu Dios ta basta. Ban bek y wak e fundeshi di e politica cu a logra cosnan grandi yama bon bini tambe na e generacion y politica nobo. Esnan cu kier join, hobennan, partidonan politico bon bini, pero ban traha cu plan, ban traha a base di vision, ban traha a base di logra cosnan cu e pueblo aki merece”.
