Parlamentario Hendrik Tevreden, lider di Fraccion di MEP:
ORANJESTAD (AAN): Den un declaracion fuerte, lider di fraccion di MEP den Parlamento, Hendrik Tevreden, a trece dilanti cu Fraccion di MEP, di ningun manera ta sostene e posibel acto di malversacion cu a surgi den Stichting Sports Subsidie Aruba (SSA).
Tevreden a referi na e investigacion cu ta tumando luga despues cu a surgi indicacionnan di iregularidad den maneho di fondo di SSA.
Segun Tevreden, e posicion di su fraccion ta di cero tolerancia pa corupcion y mal maneho di fondonan publico, sin importa ken ta envolvi.
"Integridad y transparencia ta fundamental. Di ningun manera lo defende ni ta proteha ningun persona cu ta kibra e regla aki, y nos ta remarca cu si tin malversacion, e persona envolvi lo mester carga e consecuencia legal," a señala Tevreden.
E lider di Fraccion di MEP a enfatisa cu Gabinete Wever-Croes II ta pone integridad na un lugar prominente den su maneho. "E posibel acto di malversacion ta un situacion lamentabel, pero nos ta laga sa cu si algo a cana robes den SSA, lo tin un proceso legal pa atende e responsabel," Tevreden a bisa.
Tevreden ta boga pa un investigacion husto y transparente, pa asina e sistema di husticia por cumpli cu su deber na un manera corecto.
"E personanan cu a kibra e confiansa di nan organisacion di cual hopi persona den nos comunidad ta depende di dje, ta trece un mancha y bruhamento grandi den e sistema y nos no ta defende esey. Nos ta confia cu husticia lo prevalece, y cu lo sali mas claridad riba e sucedido aki pronto" e lider di fraccion di MEP a conclui.
