MEP ta urgi Ministro di Salubridad pa pone e ser humano na prome lugar

Reunion encuanto Crisis na Hospital

ORANJESTAD (AAN): Dialuna mainta Fraccion MEP Parlamento a reuni cu directiva di Hospital pa asina e representantenan di pueblo por haya un mihor bista di e crisis financiero.

   Manera cu DIARIO a bin ta trece extenso caba dilanti, ta asina cu tur luna Dr. Horacio Oduber Hospital tin un deficit di 4 miyon Florin. Consecuentemente ya caba 1 sala di operacion a wordo cera.  Esey nifica cu como 5 pa 10 pashent lo no por haya un turno pa wordo opera tur dia.

   Esey no ta tur, pasobra manera DIARIO a indica, e Departamento di Endoscopie a wordo cera Diasabra y 5 pa 10 pashent no ta haya servicio. Remedinan ta wordo entrega laat of no ta wordo entrega mes.

   “Directiva a bati alarma, specialistanan medico a bati alarma, sindicato a bati alarma y minister Wyatt-Ras ta den silencio,” segun fraccion di MEP a indica.

   Pa tal motibo, nan ta urgi e minister pa pone e ser humano na prome lugar, haci cuanto investigacion cu bo kier, pero busca solucion prome y no pone salud di hende na peliger.