*Na 2017 a tuma dos luna pa negocia un acuerdo di coalicion - ORANJESTAD (AAN): Evelyn Wever-Croes den su pechi di lider di Partido MEP,
a duna un discurso diasabra madruga despues cu e resultado di eleccion a bira conoci.
Wever-Croes a manifesta hopi emociona, meymey di tur su team y un multitud cu a reuni na Cede di partido MEP, cu e ta felicita pueblo di Aruba pa un dia di eleccion ehemplar.
El a felicita tambe e partidonan cu saca asiento y cu a presenta bon ideanan pa por soluciona e problemanan di e pais.
"Pueblo a aproba e maneho di Partido Movimiento Electoral di Pueblo. Pueblo a aproba e hecho cu nos a bin ta bringa pa integridad den gobernacion y pueblo a reconoce e trabao duro y e sacrificionan grandi cu a wordo haci den maneho di nos pais den e ultimo tres aña y nuebe lunanan aki pasando den e peor crisis cu nos pais y mundo henter a conoce", a bisa.
El a remarca cu e ta hopi contento cu Partido MEP ta e partido mas grandi di Aruba. Aparte di esaki pueblo a papia cla y pueblo a pidi coalicion y "nos di Partido Movimiento Electoral di Pueblo ta cla y dispuesto pa forma e siguiente coalicion pa e gobierno di Aruba".
"Nos ta cla pa asumi e responsabilidad ey, no cu menasa, no cu forsa, pero cu dialogo pa yega na acuerdonan den e mihor interes pa Aruba na prome lugar", Wever-Croes a manifesta.
Na 2017 a tuma dos luna pa negocia un acuerdo di coalicion y no tabata facil, a enfatisa. Lo warda riba Gobernador su desicionnan di apunta un informador cu lo sondea posibilidad cu e diferente partidonan y despues lo apunta un formador pa forma e siguiente gobierno, e lider di MEP a expresa.
El a finalisa bisando cu nan lo continua cu e esfuersonan di recuperacion di Aruba.
