ORANJESTAD (AAN) – E lider di Partido Movimento Electoral di Pueblo, Evelyn Wever-Croes, den un entrevista cortico cu DIARIO, durante e parada di victoria di MEP,
a expresa cu e ta hopi contento cu e resultado di eleccion, y a invita tur hende pa celebra cu nan, sea cu a duna of no nan sosten na MEP.
El a expresa cu e proximo gobierno ta bay traha pa un Aruba y pa nos pais recupera. Tabata tin hopi reto, el a subraya. Tabata tin 11 partido cu MEP mester a competi cu nan, y cu indudablemente a come di nan votonan, pero asina mes nan a resulta ganador. Wever-Croes a bisa cu gobierno di MEP a colabora tres aña cu 9 luna, den un tempo hopi dificil, ultimo temponan door di e pandemia, y mester a tuma decisionnan duro, pero asina mes nan a wanta nan 9 asiento, a gana eleccion, y ta e partido mas grandi, y esey ta yene cu mas alegria.
Evelyn Wever-Croes a bisa cu MEP ta considera e 1.300 voto cu nan a bay atras cu e por tabata mucho peor, pues nan ta hopi contento cune.
Dialuna awo nan ta cuminza cu e parti di informacion, y nan ta keda pendiente di Gobernador, ken a invita tur e lidernan politico caba. MEP su beurt ta Diamars merdia, y di eynan nan ta mira con ta sigui. Finalmente, e dama a bisa cu esaki tabata un celebracion di victoria pero tambe di gradicimento pa e voto y nan compromiso cu lo no defrauda e voto.
