MEP a presenta un mocion pa Gobierno dialoga cu sector comercial

Parlamentario Evelyn Wever-Croes

ORANJESTAD (AAN): Parlamento a aproba aumento di salario minimo entrante 1 januari 2026. “Un biaha mas mi ta gradici colega parlamentario di MEP Shailiny Tromp-Lee y ex Minister Glenbert Croes pa haci esaki posibel. E ley aki ta un paso husto, pasobra tur trahado mester gana suficiente pa hiba un bida digno.

Sinembargo e aumento aki, specialmente pa empresanan chikito y mediano, por trese cun’e aumento di prijs. Y si esaki pasa, ta e consumidor ta esun cu lo paga e cuenta.

Pa e motibo aki nos fraccion a presenta un mocion pa pidi Minister di Finansas pa bai den dialogo cu sector comercial, y ofrece compensacion financiero pa e companianan por absorbe e gasto extra di e aumento di e sueldo minimo, sin mester di aumenta prijs. Nos a duna algun ehempel: subsidio pa empresa chikito, apoyo pa sector cu hopi trahado, y incentiva innovacion. Tur cu un meta: evita cu prijsnan ta subi, y proteha poder di cumpra.

AVP Y FUTURO

Lamentablemente AVP y Futuro a vota contra, sin duna ningun splicacion. Nan ta papia hopi di costo di bida den nan acuerdo di gobernacion, pero awor cu nan mester a pone e palabranan den accion, sin ningun motibo, a vota contra y e mocion a wordo rechasa. E actitud inmadura aki di e parlamentarionan di AVP y Futuro ta di lamenta. Un gran oportunidad a bai perdi di mustra comunidad cu di berdad bo ta preocupa pa costo di bida.

“E aumento di salario minimo ta y lo bira un realidad entrante 1 di januari 2026, y e riesgo di aumento di prijs ta real. Mirando cu e mayoria den Parlamento no kier a asumi nan responsabilidad, mi a manda un carta directamente pa e minister den cual mi a pidi minister pa actua. Nos pueblo mester proteccion, pasobra hustisia social no por bira inhusticia financiero” Lider di MEP Evelyn Wever-Croes a duna di conoce.