Marisol Lopez-Tromp a bira lider di Partido MAS

ORANJESTAD (AAN): Apenas siman pasa, DIARIO a haya informacion cu Partido MAS ta cla pa bay pa eleccion 2021.  Holmo Henriquez cu antes tabata liga cu MEP, pero

despues a lanta su propio partido, a indica na fuentenan cercano, cu e ta cla pa bay eleccion di 25 di Juni 2021.  Su idealnan pa traha pa progreso di Aruba keto bay ta den su curazon.

   Pero un desaroyo nobo a presenta e siman aki, ora cu aparentemente ex-Ministro Drs. Marisol Lopez-Tromp a acerca Partido MAS y despues di negociacionnan, Partijraad a duna OK pa nan haci Marisol bira nan lider pa Eleccion 2021.

   Di algun siman caba por a nota riba social media, cu tin hopi hoben cu cada rato ta puntrando si acaso Marisol ta bay riba un lista of no.

   Esaki a socede desde cu hopi hoben a bay mira tanto na TV como tambe riba streaming di Internet, a mira unda Marisol como Ministro a wordo yama pa papia den e famoso reunion di fin di Juli 2020.

   E tabata un reunion publico pidi pa fraccion di POR pa purba baha nan minister Marisol.  Como partner den coalicion RED y MEP a duna sosten pa fraccion di POR yama e reunion pa kita confiansa den nan minister actual di Infrastructura Marisol Lopez-Tromp. Tin di splica cu mester tin tres firma pa cualkier reunion por keda yama y fraccion di POR tin 2 parlamentario so.
   Den e reunion cu a wordo yama, den e prome tanda, Marisol Lopez-Tromp a bini cu algun acusacion basta pisa contra su colega minister Bikker, y a laga sa cu e tin mas acusacionnan pendiente pa e segunda tanda.

   Como cu e reunion a wordo posponi abruptamente, hubentud a keda sclama pa e 2ndo Tanda.  Tambe nan a admira Marisol e tempo ey como un dama cu ta tribi di bin cu acusacion serio durante reunion.

   Awor pa eleccion 2021, esaki lo ta prome biaha cu Marisol Lopez-Tromp a bira lider di un partido.  E lo ta un eleccion unda tin pues ya 3 lider femenino di partido, esta Evelyn Wever-Croes di Partido MEP, Lisette Malmberg di PPA ReformA, y tambe Marisol Lopez-Tromp di Partido MAS.

   Riba e potret por mira Holmo Henriquez den su Bus di MAS durante eleccion 2017 unda pa prome biaha e partido a participa.  Tambe por mira Marisol Lopez-Tromp cu documentonan den su man durante e famoso reunion di Parlamento.