ORANJESTAD (AAN): Parlamentario Marco Berlis di MEP, a splica con durante di tratamento di e Presupuesto 2024 riba diahuebs anochi un biaha mas nos por a contempla y scucha e actitud y palabranan barbaro di sr. Miguel Mansur di partido Accion21.
Despues di su ausencia pa un dia y mey na e tratamento di e ley di mas importante di nos pais, pasobra cu el a dicidi di tuma vakantie y lora den sneu enbes di bin traha, Mansur a cuminsa compara y gaba con miho Bonaire ta cu Aruba y cu nos pais mester ta mas manera Bonaire.
Reflexion di e comparacion di Mansur entre Bonaire cu Aruba:
(1) Mansur a bisa cu na Bonaire, cu ta provincia di Hulanda desde 2010, lo bay conoce un aumento di e salario minimo na juli 2024. E salario minimo lo worde aumenta di $1.236 pa $1.750 y cu Hulanda ta bay inverti miyones awo pa yuda e Bonerianonan. Esaki ta punto di hustificacion cu Mansur ta menciona, sinembargo loke e no ta bisa ta lo siguiente: (1) Ora Bonaire a bira provincia di Hulanda, su moneda, e Florin a bira dollar. (2) Prijsnan a cambia di 1 Florin pa 1 Dollar, pero salarionan a djis worde dividi pa e balor di Dollar y ciudadanonan di Bonaire a perde den un solo decision di Hulanda como 70% di nan poder di compra. Esaki Miguel Mansur ta desea pa Aruba?
(2). Desde cu Bonaire a bira un provincia Hulandes, tin mas Hulandes ta biba na Bonaire cu Boneriano mes, ya cu cos a bira barata pe Hulandes biba na Bonaire pero pe Boneriano tur cos a bira caro. Esaki Mansur kier pa Aruba?
(3). Bonaire a bira un provincia na 2010 y durante e tempo aki Bonerianonan a perde mayoria di nan negoshi cu a worde cumpra pa Hulandesnan, a perde terenonan, casnan, y pobreza extremo a dal Bonerianonan. Esaki Mansur kier pa Aruba?
(4). A tuma 14 aña pa Hulanda realisa cu mayoria Bonerianonan ta den pobreza? Kiermen pa 14 aña Bonerianonan mester a sufri pobreza na man di colonialistanan, cualnan a tarda 14 aña pa instala comisionnan di Tweede Kamer cu a keda den “shock” pe pobreza structural na bin haya na Bonaire? Esaki Mansur kier pa Aruba?
(5). Salario minimo lo subi na Bonaire. Corda si ta salario minimo so ta subi, esaki no lo yuda Bonerianonan sali di pobreza. Ke hubo di e otronan cu ta lucha y cu ta gana net riba e salario minimo? Nan lo haya un ayudo? No! Esaki Mansur kier pa Aruba?
(6) Tweede Kamer di Hulanda a instala comisionnan Thode y Nibud, cualnan a haci un investigacion pa averigua cua ta e suma cu e pueblo di Bonaire mester minimal. Kico nan a constata? Un hogar cu ta consisti di un mayor soltero y cu tin dos yiu, ta perde 2/3 parti di su entradanan na gasto basico. Un pensionado soltero ta perde mita di su salario na gastonan.
(7). E Comision di Thode y Nibud a bin constata cu e “uitkeringnan” ta catastrofico abao. Mayoria di hende na Bonaire cu ta pober “tin trabao normal.” Pero pasobra e salario minimo a keda demasiado abao pa mucho tempo y e costo di bida ta demasiado halto, esaki a causa cu aunke e hendenan ta traha nan ta keda pober. Esaki ta loke Mansur kier pa Aruba?
(8). Den e mesun rapport tambe ta mustra cu 1 di cada 3 Boneriano ta den pobreza. Esaki ta loke Mansur kier pa Aruba? Ya bo sa e contesta.
Pueblo awor ainda ta kere cu e Boneriano a bay dilanti como provincial y decisionan descabeya di Hulanda? Absolutamente cu no. Hulanda ta trata e Boneriano como un tweederangsburger y ta exactamente esey Mansur ta desea pa Aruba. Despues di a wak su actitud recien atrobe, uno masha bergonzoso den cual Mansur a lastra clero catholico y insinua cu nan ta homosexual, ataca religionan Cristian y nan liderazgo y creyentenan, lastra, insulta y malusa e Palabra di Dios, ainda bo por kere cu algo decente y serio por sali di Miguel Mansur? Ya bo sa e contesta.
