Segun Juni Croes di AVP:
ORANJESTAD (AAN): Miembro di Partido AVP, Juni Croes, a expresa cu un biaha mas e gobierno aki ta hunga cu sentimento di pueblo y ta purba manipula pueblo pa asina pueblo, specialmente nos grandinan cu ta recibi e pensioen di SVb y tambe esnan cu ta gana salario minimo cu un aumento ficticio, un aumento di mentira.
Un aumento cu no ta dunabo mas placa den bo cartera,un aumento cu no ta aumenta e poder di compra, pero cu realmente e ta un aumento chiripero, un aumento cu kier tuma pueblo haci un biaha mas, ta realmente den practica un aumento di cerio Florin. Esaki mester worde conclui a base di informacion di Oficina di Estadistica CBS, cu a emiti cu e bestaansminimum a aumenta pa un pareha cu 2 yiu na aproximadamente 85 Florin. Es decir plaka cu un pareha mester pa sobrebibi tur luna a subi cu 85 Florin.
Esey ta nifica e aumento di salario minimo no lo haci ningun efecto ariba cartera di nos ciudadanonan cu ta cobra salario minimo. E gobierno di mas manipulador den historia di Status Aparte kier pa abo celebra, pasobra segun nan, awo pueblo por biba bon cu aumento di casi 90 Florin.
Mientras abo como salario minimo tur dia mester wak con pa rek bo placa, pa bo yiunan por come, con bo ta haci pa paga gasoline pa bo yega trabao tur dia, y otronan mester wak con nan ta paga transporte pa sali kizas di San Nicolaas bay traha pabao na playa of na hotelnan, mientras pueblo ta cremencha pa sobrebibi, y purba di pasa un fin di aña digno hunto cu nan famia.
Gobierno si ta mustrabo tur dia con nan si por viaha tur siman,nan si por core auto nan caro, nan si por duna nan yiunan tur cos cu placa di bo sudor, cu placa di pueblo cu ta placa di belasting.
Poco dia pasa den mesun mente di maldad y manipulashon cu ta caracterisa e Partido mep y awo cu su aliado malbado cu ta Raiz. Un par di parlamentario cu ta sostene e gobierno aki ,tambe ta bay den wega di tira santo den wowo di nos grandinan cu ta biba di pensoen di viehez y bisando cu nan a presenta moshon nan (deseo) den e reunion di presupuesto, pa duna varios beneficio na nos grandinan, entre otro reduction di prima AZV, no yena formulario di inkomsten belasting mas, etc.
Esaki ta otro manipulashon, pasobra un moshon ta simplemente presenta un deseo, anto door cu nan sa cu AVP y otro partidonan di oposicion lo vota contra e presupuesto di Aruba, mirando cu e presupuesto no ta refleha e dolor di pueblo, no tin ningun Alivio pa e pueblo ,nan a presenta esey pa asina bin hunga e politica y bisa cu AVP a vota contra e moshon aki,door di a vota contra e presupuesto, ta un otro wega di mucha chiquito, mentenan manipulador y pa sigui hunga cu sentimento di nos grandinan, varios di e parlamentario nan aki cu sigur den un otro eleccion no lo tey mas den panorama politico.
“Y mi ta bisa esaki enfaticamente, pasobra si di berdad e parlamentarionan aki cu ta poppenkast di e gobierno aki, kier a bin cu algo bunita y special pa nos grandinan, nan no a presenta un mocion, pero un amienda pa asina aloca fondonan di biaha den e presupuesto y ehecuta e decision y deseo aki inmediatamente como parlamentario den parlamento cu ta e organo mas halto aki na Aruba y no hunga un wega politico y hunga cu sentimento di nos grandinan , di bin cu mocion, pa gobierno bay studia añanan largo y cu nunca lo bira realidad.
Pero Pueblo laga nos conserva nos fe y cu pa corda cu penado no ta pena pa largo,cu cambio di gobierno cu ta pronto na caminda, pueblo y specialmente nos grandinan y esnan di salario minimo lo sinti Alivio back,un gobierno di AVP cu den pasado y semper a Sali y defende nos grandinan, un biaha mas tin e compromiso pa duna e balornan aki back na pueblo, e balor di ser respeta, e balor di por biba un bida digno, e balor pa abo traha y cu placa lo yega back den bo cartera, pa asina por cria bo famia den un manera digno sin dolor di cabes.
Segun Juni Croes, esey ta su compromiso y di Partido AVP. El a bisa cu nos tur tin di corda cu un dia mester bira grandi y nos, ami tambe lo kier tin un bida digno y trankilo ora di yega momento di cobra pensioen. Pasobra ta parce cu nos gobernantenan ta lubida of ta pensa cu nan nunca lo bira un hende grandi ,of kizas nan a enrikece nan mes asina hopi cu placa di pueblo cu nan lo no tin mester un bon entrada mas, pero nan no mester lubida cu mandamento di DIOS ta bisa pa stima nos prohimo, manera nos ta stima nos mes ,es decir no pensa ariba bo so, pero pensa ariba henter e pueblo.
