Lider di partido Partido Pueblo Prome a vota na Santa Cruz

ORANJESTAD (AAN)- E prome lider di partido cu a haci su derecho di voto ta Sr. Michael Williams di e  partido Pueblo Prome.

   Sr. Williams a vota mainta tempran na Colegio San Antonio na Santa Cruz.  Su mensahe ta cu pueblo awor ta bay stop corupcion pa semper, y tin di haya un Gobierno husto.  Na momento di votamento e tabata acompaña pa algun sostenedornan.  Cu nan bandera nan a demostra nan lealtad na e partido Pueblo Prome, y cu nan ta sigur nan lo bay logra manda un mensahe cla y raspa.

   Williams a reclama cu nan a tende cu tin hopi hende cu no tabatin forma pa yega urna electoral.  El a denuncia tambe cu tin votadornan hospitaliza na HOH aworaki, pero parce cu nan no a haya chens di bay vota.  E ta convenci cu tin grupo cu a haci tur nan esfuerzo pa stroba hendenan di haci uso di voto.

   El a bisa cu pa Partido Pueblo Prome, nan lo percura pa e ser humano no ta wordo bandona, laga pafo, y destrui!  E ser humano ta un di e prioridadnan sigur.  Otro plan grandi di Pueblo Prome ta pa pone finanzas bek riba pia, y pone e ser humano y pensionado central.   Nan kier pa Aruba bira uno di nos tur atrobe.

   Nan kier pa bin bek cu stabilidad na Aruba cu trabaonan duradero y bon paga, y no cos di cheap labor.  El a splica cu partido Pueblo Prome a lanta pa trece cambio.