ORANJESTAD (AAN) – “Pa hopi aña tur politico durante e ultimo 3 decadanan aki a priminti di a traha na bienestar pa e hubentud.
Pero como un hoben, ami no ta sinti cu mi bienestar tabata un prioridad. Awe como un hoben di e generacion Z, Zoomers nos tin un debe di mas o menos 70 mil florin sin cu nos a pidi pe. Ni 1 cen pa inverti den e vision di futuro. ”
Den un entrevista cu DIARIO a tene cu Leonardo Figaroa e ta conta ken e ta, pakico el a haci un entrada den politica y su vision pa Aruba.
“Mi nomber ta Leonardo Rafael Figaroa, mi tin 20 aña. Ma nace na Noord, pero ultimo añanan bibando den Oranjestad. Pa e eleccion aki mi ta formando parti como e politico di mas hoben den historia riba e partido di Accion 21. Mi a scoge Accion 21 pa ta mi organisacion politico pasobra mi ta kere den un responsabilidad comparti unda cu e gobierno tin un obligacion pa brinda oportunidadnan y recurso na cada ciudadano pero alaves e ciudadano tin e deber pa haci uso di e recursonan aki pa alcansa su potencial maximo.
ENTRADA DEN POLITICA
Mi a haci mi entrada den politica pa eleva nivel, pa promove madures politico y lucha pa progreso di Pais Aruba. Durante e pandemia mi a wak con mi futuro a perde speranza, danki na un rivalidad cu tabata mas importante cu e futuro di 16 mil hoben incluyendo ami. Mi mision ta pa fungi como un voz berdadero pa e hubentud, Concientiza, informa, activa y conecta e hobennan, hobennan adulto y adulto hoben cu ta e hobennan bao 109 aña cu politica y progreso.
UN VOTO PA MI
Un voto pa Leonardo Figaroa ta un voto pa empoderacion di nos hubentud, lucha y defende e tratado di derechonan di mucha. Para firme pa desaroyo sostenibel cu medio ambiente y proteha esaki mirando e responsabilidad cu nos tin cu e futuro generacion. Siguientemente para firma pa organisacionan y fundacionnan cu semper a soluciona retonan di un forma creativo pa esnan di mas vulnerabel den nos comunidad. Y como cu mi mama ta den un rolstoel pami personanan invalido tin un lugar special den mi curazon, crea un sociedad inclusivo.
Hobennan, hoben adult y adulto hoben, mi maximo deseo ta pa boso vota consciente, vota pa abo, vota pa bo futuro, vota pa Aruba. Pesey Accionista ban conecta progreso.”
