ORANJESTAD (AAN): “Nan tabatin basta durf di bin cana y core campaña den nos area di Sabana Basora!”
Esey ta loke algun ciudadano a comenta, ora cu diripiente uno tras di otro, campañadornan politico a drenta y bishita votadornan na Sabana Basora.
Prome a drenta un candidato hunto cu su campañadornan di AVP. Mesora e habitantenan a para nan, y splica nan con na aña 2009 caba ora cu AVP a bin den e bario, e habitantenan a haya promesa cu durante gobernacion di 2009 pa 2013 lo percura pa e bario aki haya caminda di asfalt y tambe luz di caya. Pero nada a socede.
A recorda nan con na 2013, un biaha mas durante campaña, esnan di AVP a bin cana dilanti nan cas, y a bolbe priminti cu si nan keda den Gobierno di 2013 pa 2017, cu nan lo percura pa e bario haya asfalt y tambe luz di caya. Nada a socede.
Asina na 2017, Gobierno a cambia y awor ta un coalicion lider pa MEP ta gobernando. Y e biaha aki si, e Gobierno aki a pone asfalt y luz di caya pa e habitantenan!
Pesey mesora a puntra e campañadornan, si nan ta corda tur nan promesa bashi di 2009 y tambe promesa igual sin fondo na 2017. E campañadornan mester a djis keda keto, guli nan palabra, y cana bay. Pues e parhanan aki a bin canta demasiado laat.
Poco rato despues, esta como 1 ora mas laat, a mira cu campañadornan di PPA tambe a pasa den Sabana Basora. Un tiki mas despues di esey a mira campañadornan di POR den bario.
Pero ya caba por mira cu Gobierno actual a sa di pone asfalt y drecha infrastructura den e area aki di Sabana Basora. Un area cu pa hopi decada a sufri di stof, di molester di caminda kibra durante awacero, y tambe di pesadiya di pasa den lodo.
Dos biaha den campaña AVP a priminti, pero nada. Nan ta gradici Ministro Evelyn Wever-Croes cu si a cumpli cu e promesa di pone asfalt pa nan.
