Eduard Pieters di PPA:
ORANJESTAD (AAN): Fraccion di PPA a sali duro contra Presidente di Parlamento, sr. Marlon Sneek, despues cu PPA a haci investigacion propio tocante e informacion presenta relaciona cu Rijkswet HOFA. Ningun momento e gremio comercial a expresa oficialmente cu nan ta pro Rijkswet HOFA, contrario na e declaracionnan cu presidente di Parlamento a haci publicamente.
Pa parlamentario Eduard Pieters, esaki ya no ta solamente un diferencia politico, pero un asunto serio di credibilidad, transparencia y respet pa pueblo di Aruba.
PPA a verifica personalmente cu e gremionan: Despues cu presidente di Parlamento a declara den medio di comunicacion cu e gremio comercial ta sostene Rijkswet HOFA, PPA a tuma iniciativa pa tuma contacto directamente tanto cu representantenan di e gremio comercial como doño di negoshinan.
“Pa nos sorpresa, varios di nan a confirma cu nunca nan a expresa, ni verbalmente ni por escrito, cu nan ta pro Rijkswet HOFA,” Pieters a declara. “Ni sikiera nan tin un standpunt oficial cu ta sostene e ley aki.”
Segun Pieters, esaki ta mustra cu presidente di Parlamento a crea un narativo falso riba un asunto constitucionalmente hopi delicado.
Parlamento no ta oficina di propaganda: Pieters a conecta e episodio aki cu un patronchi cu, segun Pieters, ta birando cada bes mas evidente den con ta maneha Parlamento.
“Siman pasa nos a mira con presidente a core schors un reunion, prome cu un minister wordo obliga pa contesta e preguntanan legitimo di Parlamento,” el a enfatisa. “Awor nos ta mira cu e mesun presidente ta sali publicamente cu informacion cu no ta corecto.”
Pa PPA, Parlamento mester ta un institucion neutral, cu ta proteha democracia y control politico, no un instrumento pa defende gobierno of manipula percepcion publico.
Stempel-Voorzitter: Den un di su criticanan mas fuerte, Pieters a bisa cu Parlamento a perde direccion y liderazgo institucional. “E no ta sigui ni e propio Reglamento di Ordo cu ta obliga pa yama e reunionnan dentro di termino stipula,” Pieters a enfatisa. “Ni reunion, ni coordinacion, ni liderazgo. Ta un berguensa nacional pa e organo di mas halto di nos pais.”
Segun Pieters, e problema ta hopi mas profundo cu solamente Rijkswet HOFA. E ta bisa cu confianza di pueblo den democracia ta wordo mina, ora informacion no ta corecto y ora liderazgo politico ta opta pa manipulacion en bes di claridad.
HOFA ta demasiado serio: Pieters a enfatisa cu tema di HOFA no ta un topico cualkier, pero un ley cu toca directamente autonomia, budgetrecht y futuro constitucional di Aruba.
“Ta extremamente iresponsabel pa hinca e gremio comercial den problema door di gaña riba nan y crea impresion cu nan ta sostene algo cu nan nunca a sostene,” el a declara.
Segun PPA, e propio conseho di Raad van Advies a confirma cu tin preocupacion serio tocante articulo 38 di Rijkswet y e impacto riba autonomia di Parlamento. P’esey, Pieters ta considera ainda mas grave cu un Presidente di Parlamento ta “purba bende un sentido di consenso falso”.
Den su mensahe final, Pieters a manda un advertencia cla: liderazgo politico no por basa riba gañamento, percepcion of propaganda. “Pueblo merece berdad, no manipulacion,” el a conclui. “Y ora Presidente di Parlamento mes ta bira fuente di informacion incorecto, e confianza den nos democracia ta kibra mas ainda.”
