Parlamentario Edgard Vrolijk sorprendi
ORANJESTAD (AAN): Parlamentario Edgard Vrolijk di MEP, a relata cu el a tuma nota cu no un, sino tres Minister, esta Minister Mike Eman, Minister Gerlien Croes y Minister Geoffrey Wever, ta na Hulanda pa e instalacion di e Minister Plenipotenciario, Mildred Schwengle.
Locual ta resalta mas ta cu e tres ministernan aki no a biaha nan so; nan a ser acompaña pa famia, un grupo grandi di coordinador y prensa, resultando den gastonan cu ta sobrepasa 250.000 Florin pa bay haci un fiesta.
Di NO mester, pa celebracion: Esaki ta contra di locual a ser manifesta den pasado. Tabata apenas un par di luna pasa cu Minister Gerlien Croes a declara cu Aruba no tin mester di un Minister Plenipotenciario, pasobra esaki ta un gasto demasiado halto pa nos pais. Den e mesun publicacion ey, e Minister a presenta e cifranan di e Minister Plenipotenciario anterior pa hustifica cu Aruba no tin mester di un representacion asina, afirmando cu e mes lo a biaha tur luna pa Hulanda pa cubri e trabou.
Y awor… por mira e mesun Minister aki ta di fiesta na Hulanda, cu un glas di champagne den man, malgastando placa di pais Aruba pa bay celebra e instalacion di e Minister Plenipotenciario. Con pueblo por kere den e palabra di e Minister aki, ora su propio actonan ta kita tur balor y credibilidad for di dje.
Bebe champagne y pueblo ta sufri: E decision di Mike Eman, Geoffrey Wever y Gerlien Croes pa malgasta mas di 250.000 florin na un biahe acompaña pa famia, coordinadornan y prensa, ta un golpi duro na momento cu dia pa dia pueblo ta ser asota pa e costo di bida asina halto.
E realidad ta cu, e mandatarionan aki por organisa fiesta riba custia di pueblo, bebe champagne caro y come caviar, mientras cu e ciudadano comun tin cu lucha diariamente pa wak con e por pone pan na mesa pa su yiunan.
Esaki ta e abuso cu abo como ciudadano ta bibando na man di un grupo cu, sin escrupulo, ta malgasta bo placa y kier gaña bo wowo, mientras nan ta pasa dushi riba bo custia y riba esun di bo famia. Cos a bolter pa fiesta y mas fiesta, mientras abo tin di traha duro pa yena caha di pai Aruba pa Minister Mike Eman, Geoffrey Wever y Gerlien Croes sigui biaha y gosa, y abo ta come inflacion di Geofrey Wever.
Esaki ta e potret di Gobierno na Hulanda cu Parlamentario Vrolijk ta referi na dje.
