ORANJESTAD (AAN): Manera a wordo anuncia varios luna pasa, Instituto Medico San Nicolas (ImSan) a cuminsa duna tratamento na pashentnan cu mester di
tratamento cu radioterapia cu antes mester a bay afo pa esaki.
Solange Tchong, Relacionista Publico di AZV a duna di conoce cu mester analisa e situacion aki for di dos punto di bista. Prome cu Covid-19, berdad AZV tabata manda hopi pashent di cancer afo, principalmente pa Colombia, pa nan haya tratamento di radioterapia, entre otro.
Aworaki, desde cu ImSan a cuminsa tuma over un gran parti di e pashentnan aki cu antes tabata bay Colombia via AZV.
Loke ta wak ta cu ImSan awor ta atendiendo pashentnan. Ta trata di un cantidad di entre 240 pa 280 pashent cu nan a atende entre tanto. Si ta wak esey, un gran mayoria tabata loke antes AZV tabata manda afo pa Colombia, Tchong a detaya.
Esaki ta den un trayecto caba cu AZV tambe tabata kier wak pa poco poco cuminsa yuda mas pashent na Aruba y door di e servicionan di ImSan awor ta wak cu esey ta posibel. E pashentnan aki no tin nodi di sali mas y keda seis siman of 8 siman afo.
E pashentnan por haya nan tratamento na Aruba cual ta hopi mas beneficioso pa e pashent pasobra nan ta keda den nan mesun ambiente, nan tin nan famia cerca pa yuda nan y duna nan sosten, a bisa.
Esey ta wordo refleha den e cantidad di pashentnan cu AZV no mester a manda afo den e sentido cu nan a bira menos, a Solange Tchong, PR di AZV a remarca.
