ORANJESTAD (AAN) -- Parlamentario Endy Croes ta amplia riba deporte. Desde 13 di maart 2020 cu Covid 19 a hasi su entrada na Aruba, esaki a causa cu
deporte en general a wordo afecta enormemente. No obstante esaki, Minister di Deporte Dangui Oduber tabata tine hopi dificil desde november 2017 cu a tuma e cartera di deporte over.
Pa cuminsa, si compara e periodo di MEP 2001-2009 y AVP 2010-2017 por tuma nota cu tras di un vision y un maneho agresivo di Ramon Lee, ex-minister di deporte 2001-2009 e tempo aya, a inverti masha hopi na infrastructura y inversionnan cuantioso den e atleta directo.
A logra construi cu placa di Lotto Stadion Frans Figaroa, Stadion Nadi Croes & Crismo Angela, comberti Parke Jaburibari di un dump (cu AVP a laga atras na 2001) pa un Parke multifuncional, a traha dos centro deportivo na Jara y Simeon Antonio, dos parke di baseball na Pos chiquito, a renoba y drecha iluminacion na 15 cancha rond Aruba y banda di esaki a inverti 20 miyon den Federacionnan pa cu e Atletanan y Seleccionnan directamente. AVP sinembargo den periodo (2010-2017) no a construi ni un solo facilidad, no a mantene e facilidadnan cu MEP a construi pero a opta pa malgasta 10 miyon florin di deporte solamente na investigacion, abogado, companianan di investigacion. Mas tristo ta cu a perde tur caso den beroep y cassatie.
Deporte por a uza e placa aki na otro forma. NO a mantene e stadionnan unda awe futbol, por ehempel, mester hunga weganan internacional, no a traha ningun facilidad y Lotto ta draai den problema cu mesun bestuur cu Mike De Meza y Mike Eman a instala desde e tempo aya.
Gobierno actual no tin grip riba Lotto:
Den historia tin graba cu desde 1982 a logra habri Lotto pa Deporte. Tras di vision di Betico Croes, Remy Zandaam y Roy van Putten e tempo aya a bin cu Lotto pa Deporte pa deporte por haya su lugar den comunidad unda placa di Loteria ta bay pa deporte y asina hasi deporte menos dependiente di gobierno. Lamentablemente, AVP a kibra esaki y a uza miyones pero miyones di Lotto na abogado, companianan di amigo y a kibra totalmente e esencia di Lotto.
Na 2018 Dangui Oduber a bay corte cu Directiva di Lotto y a perde den Corte, pues Hues a considera cu e mesun personanan cu ya a sinta 8 aña por continua. Net promer cu gobierno a cambia, AVP a laga cambia Statutonan di Lotto unda e mesun miembronan di directiva te cu awe ta “gelijm” riba e stoel ey pa mas di 10 aña cual ta contra tur regla di “good governance”.
Pa e razon aki Minister di Deporte no a ricibi, durante e ultimo 4 añanan, ningun cooperacion di Lotto y mester tabata hopi creativo di otro forma pa logra brinda asistencia y ayudo na diferente organizacion deportivo.
Ley di Gaming Board:
Na Parlamento tin actualmente, un ley cu a yega, esta e ley di Gaming Board cual durante aña 2021 lo wordo trata. En todo caso muy pronto y promer cu September e mester ta cla. E ley aki lo trece oportunidad pa por bin cu un di dos loteria. Esaki lo crea competencia sano. Gobierno aki hamas lo firma locual AVP a firma na 2011 den desesperacion, unda nan a traspasa tur e poder y placa pa CBN Canada. Aruba awe ta na rudia y deporte sufriendo.
Cu un Lotto nobo Aruba lo conoce competencia husto y unda tin competencia semper e pueblo ta sali beneficia y den e caso aki deporte lo sali beneficia. Lo percura den e proximo gobernacion, banda di bin cu un di dos loteria, pa re-negocia e contrato cu CBN Canada pa un contrato fair y husto. Asina pueblo por mira y sinti bek unda su placa ta bay.
Por cumpra Lotto bek cu amor pasobra si Bo perde mes bo ta mira unda bo placa ta bay, entre otro, na facilidadnan y e atleta. E sentido aki ya no ta biba mas actualmente den pueblo. Lo traha duro pa restablece e confianza den e pueblo cumprador y e contacto y efecto directo cu esaki tin pa e deportista, Endy Croes a expresa.
