ORANJESTAD (AAN) – Den e conferencia semanal di Gobierno, di inicio di siman, cu a tuma lugar Dialuna aki, Minister Presidente Evelyn Wever-Croes, a hiba palabra enfocando riba e rapport di Fondo Monetario Internacional (IMF) cu a wordo publica Dialuna mes, prome cu merdia.
E mandatario a splica cu IMF cada tanto tempo ta
haci evaluacionnan di mesun articulo 4, y nan tabata na Aruba e ultimo dos simannan y Diabierna e mandatario a reuni cu nan, pa nan recomendacionnan y evaluacionnan final.
IMF a publica e rapport Dialuna pa 11 or di mainta, e dignatario a indica.
E rapport aki ta papia tambe di e recuperacion di Aruba, y pesey e kier a pone e tema aki den e contexto di IMF.
“IMF a haci un estudio na e posicion financiero di Aruba y a yega na un bon conclusion confirmando locual cu nos tabata bisando como Gobierno, cu Aruba ta den recuperacion”, Premier Wever-Croes a bisa.
E mandatario ta comparti cu pueblo, algun di e datonan cu IMF a trece padilanti, cuminzando cu Aruba su GDP.
“Nan ta haya hopi remarcable cu e GDP a crece di 2021 di 7.6%, 2022 cu 7.3% y cu e ta sigui crece y esaki ta mustra cu Aruba ta recuperando di e pandemia.
Tambe nan a papia di finanzas y e datonan di surplus di presupuesto unda nan a indica cu pa 2020 tabata tin un deficit di 6.2%, y esaki den dos aña a bira casi cero y cu aworaki nos tin e surplus di 1%”. Pues, financieramente IMF a yega na e conclusion cu e deficit aki cu a converti den surplus tambe ta mustra cu Aruba, financieramente, ta bayendo den direccion corecto, y esaki mi ta considera como algo hopi grandi cu nan ta con confirma”, e dignatario a subraya.
El a agrega cu ademas, den e “conclude statements” nan ta menciona tambe, un poco mas despues, cu e gastonan di gobierno ta apropia.
“Pues e discusionnan cu tin riba gasto, si gobierno di Aruba tin gasto mucho halto of ta gastando mas cu otro paisnan, esaki ta wordo refuta cu e rapport aki di IMF, cu ta bisa cu nos gastonan ta apropia”, Premier Wever-Croes ta reitera.
