ORANJESTAD (AAN): Minister Maduro di Finansa a tene un conferencia di prensa hunto cu directora di DIMP y director di Aduana pa asina duna informacion riba e sistema di BBO na frontera.
Durante e rueda e mandatario a haya pregunta riba e critica cu
Parlamentario Mike Eman ta treciendo dilanti bisando cu BBO na frontera ta un atraco riba cartera di Pueblo.
Minister Maduro ta haya cu sr. Eman tin basta curashi di critica, ya cu ta danki na Mike, tur dia Gobierno tin cu trata na maneha cu e megadebe cu Mike Eman su gobernacion a bay laga atras. E megadebe aki di 2200 miyon florin no a disparce cu e pandemia. Alcontrario, e situacion a bira mas dificil, ya cu mester a fia placa di Hulanda pa Aruba por a sobrevivi e pandemia. Di e manera eynan e debe di Aruba a bira mas grandi y ta exigi hopi esfuerso pa por maneha esaki.
Minister Maduro ta recorda sr. Mike Eman, cu e debe cu ela traha durante su gobernacion, a perhudica no solamente e Gobierno di turno, pero mas gobernacion nos dilanti lo tin cu bay 'struggle' cu e debe aki. Mike ta parce di no ta realisa cu cada criatura cu nace awe ya caba tin cu bay lidia cu e debe cu Mike Eman a traha pa nan ora nan ni sikiera tabata naci. Ta esaki ta e embergadura di e debe cu Mike Eman a traha pa Aruba y pa nos yuinan.
Den e añanan cu a transcuri, Minister Maduro a traha pa por stop e crecemento di e debe di Aruba y ta haciendo lo posibel pa organisa e peso di e debe aki di un manera cu Pueblo por maneha esaki.
BBO na frontera ta wordo introduci pa crea un 'level playing field' den comercio y tambe pa mehora cumplimento cu impuesto. Na ningun momento ta e intencion pa bay atraca e cartera di Pueblo. E ultimo eynan ta keda e legado exclusivo di Mike Eman pa Aruba.
