Parlamentario Rocco Tjon:
ORANJESTAD (AAN) -- Parlamentario Rocco Tjon, den entrevista cu Matutino DIARIO, a sigui elabora riba e carta di preocupacion di Sindicato di Polis (SPA), na e Comision Fiho di Husticia den Parlamento, relaciona cu necesidadnan cu KPA tin, y cu no ta wordo soluciona pa falta di recurso financiero.
Parlamentario Tjon a expresa cu el a scucha e parlamentario di coalicion, cu ta sostene gobierno, cu ademas ta presidente di e Comision di Husticia, bisa, entre otro, cu e minister mester splica, haci... y cu SPA mester check cu Korp Chef y cu Minister... “Pero e parlamentario aki no ta compronde su trabao, y mi ta bisa esaki cu tur respet, pasobra como parlamentario bo tin masha hopi tarea mes. Awo, nos ta den oposicion nos tin diez so; abo tin mayoria toch, abo por manda pregunta por escrito, si no contesta bo, bo tin e mayoria bo por yama e minister akiden puntre di con e no ta contesta. Nos ta manda pregunta, nos no ta haya contesta, nos ta pidi documento, nos no ta haya contesta, nos ta pidi reunionnan publico nan no ta wordo yama. Pero abo, cu ta por cierto presidente di e Comision di Husticia, obviamente e minister ta ancient, e mester ehecuta maneho, e mester tene cuenta cu e mocion; pero ken ta controla e minister? Ken ta yama e minister pa responsabiliza su mes, t’abo toch, bo ta Parlamento! Pues, bo tin mayoria, yama e minister aworaki, pa responsabiliza su mes”, Parlamentario Rocco Tjon a subraya.
Parlamentario Tjon a bisa cu e no gusta bay bek den MEP su periodo, pero hechonan ta papia si. “Nos a tuma accion, nos no a papia bunita manera mi a scucha e parlamentario aki papia. Full Aruba ta pega cu camaranan aworaki, cuanto edificio di polis a wordo renova? Wardanan di polis nobo, cuanto material nobo a wordo cumpra pa nan, full ICT a wordo renova, y mi por sigui menciona. Ora bo presupuesta suficiente pa e organizacionnan aki, bo por adkiri material pa nan, por inverti den edificio, por percura pa inverti den tecnologia, wak un ‘Operation Command Center’ y mi ta orguyoso tambe pa bisa cu ta un di e mihornan y mas moderno den Caribe”, Parlamentario Tjon a remarca.
El a acentua cu ora riba prome dia di trabao gobierno ta corta 10% di presupuesto di gobierno, esaki ta e consecuencianan, y no solamente cu no tin material ni tecnologia, no tin personal, “pero e consecuencia ta pa abo y pa mi, pa e ciudadano; criminalidad a aumenta. Cu tur respet nos a laga Pais Aruba como e pais mas safe den Caribe. Esaki no ta nos ta bisa, tin diferente estudio internacional a mustra esaki. Awo nos no ta e pais mas safe mas!” Parlamentario Rocco Tjon a recalca.
