Segun Parlamentario Rocco Tjon:
ORANJESTAD (AAN)-- Parlamentario Rocco Tjon, di fraccion di MEP, den entrevista cu Matutino DIARIO a reitera cu e consecuencia pa no presupuesta suficiente fondo pa full e cadena di husticia, e resultado ta bay wak’e den criminalidad. Esaki entorno e recorte di 10% den e presupuesto di Husticia, cu Gabinete AVP-Futuro a haci, desde su prome dia den gobernacion.
Tjon a señala cu joyriding a aumenta, problemanan social, tiramento, arma ilegal, droga, etc.
“Tin un carta cu OM a manda pa Gobierno, un par di luna atras, refiriendo specificamente na e recorte di 10%, y asina por sigui menciona. Pero mi punto ta cu nos a haci pregunta riba e ehecucion di e mocion aki, y nos no ta ricibi contesta”, Parlamentario Rocco Tjon a señala.
El a agrega cu ora nan ta den un reunion di comision of den un reunion publico, of ora den un reunion general, concretamente riba e tema di e mocion, nan no ta haya contesta.
“Mi ta bay mas leu, hopi biaha nos di fraccion di MEP ta entrega un mocion y na final, nos ta mara e mocion ey na un tempo, pa e minister mester bin bek den dos, cuater of seis siman, pero hopi biaha e miembronan di coalicion, incluso e presidente mes cu ta encabeza e Comision di Husticia, no ta na fabor pa nos mara esaki na tempo. Awo, ta con bo por monitor como Parlamento, e ora ey, e ehecucion di un mocion cu bo mes a aproba?”, Parlamentario Tjon a comenta.
Su mensahe pa Sindicato di Polis ta, cu fraccion di MEP a tuma nota di nan preocupacion y el a bisa cu un colega di dje mr. Edgard Vrolijk a planea tambe un reunion cu Sindicato di Polis, mirando cu tabata tin resess el a tuma esaki na su encargo. “Nos ta na spera cu Sindicato di Polis a sinta cu nan riba esaki. Di nos banda nos por manda pregunta, pero atrobe, nos no tin mayoria, y esey ta limita nos hopi. Mocionnan cu nos ta presenta no tur ora ta wordo aproba, pues aworaki ta n’e mayoria den coalicion, pasobra nan tin mayoria, pa yama e minister y laga e minister responsabiliza su mes. Y si e minister mester indica cu ta pa falta di fondo, mi ta kere ta na e coalicion pa aloca e fondonan aki, pasobra placa tin!”, Parlamentario Rocco Tjon a remarca.
