Gobierno realizando diferente proyecto di vivienda via di FCCA

ORANJESTAD (AAN): Prome Minister señora Evelyn Wever - Croes a worde invita door di FCCA pa mira 7 diferente proyecto di vivienda den diferente districto rond Aruba. Minister di Labor, señor Glenbert Croes, tambe tabata presente na e recorido

aki. Algun di e proyectonan ya a finalisa, por ehempel na Tanki Leendert y otronan ta den ehecucion manera na Rooi Bosal.

   E vision di Gabinete Wever-Croes, poniendo e ser humano central, ta inclui yuda tur ciudadano yega na nan cas. Y a traves di e proyectonan aki por bisa cu ta riba e bon caminda. A bishita e proyectonan na Wegkustbatterij (12 cas), Kiviti (71 cas), Isaac Wagemakerstraat (8 cas), Rooi Bosal (46 cas), Hato (8 cas), Tanki Leendert (36 cas).

   Ta importante pa mira con e proyectonan di FCCA ta worde ricibi tambe den comunidad. Durante di e recorido Prome Minister tabatin e oportunidad pa combersa cu algun habitante cu ta hopi contento cu nan tin nan cas. Gobierno tambe ta contento cu a traves di e sosten cu ta duna FCCA, por logra esaki.

   Pa conclui, Prome Minister a expresa cu apesar cu e Pandemia a stroba hopi cos, tin e speranza cu pronto lo por continua cu e trabaonan. Pa esaki mester cooperacion di cada ciudadano di Pais Aruba, pa hunto logra cu tur hende por tin dak riba nan cabes.