Partido MEP:
ORANJESTAD (AAN): Parlamento, como e instituto mas halto di nos pais, ta tambe un instituto cu mester wordo respeta pa cada miembro di Parlamento. Esaki, hopi biaha no ta e caso y comportacionnan di parlamentarionan den reunionnan publico di Parlamento ta bay bou di e nivel cu un organo halto di nos pais ta exigi.
Partido MEP ta tuma nota cu ya den algun reunion caba den Parlamento, cu Parlamentarionan Gerlien Croes y Mervin Wyatt-Ras ta comporta nan mes na forma hopi bergonzoso den Parlamento. Nan ta papia duro y hari henter ora durante disertacion di demas coleganan parlamentario. Y nan uza lenguahe cu no ta apropia pa reunionnan asina importante cu ta trata temanan importante pa nos pais insultando nos mandatarionan y demas coleganan den Parlamento.
E blanco di nan insultonan ta Prome Minister Evelyn Wever-Croes. Nan ta grit’e entre otro, cu e no tin weso di lomba, cu e tin cu buk y piki. Cu e tin dos cara. Cu e Prome Minister ta cobarde, abusado, minion, cheerleader, y cu e falta curashi.
E politica di insulto den Parlamento ta conoci ora cu no tin argumento. Y ta obvio tambe cu e Parlamentarionan femenino aki no tin argumento y ta bay bou e nivel di e organo halto di Parlamento faltando respet, insulta y cherche di mandatarionan. Esaki ta muestra di nan frustracion politico tambe pa e exito di otronan den politica.
Prome Minister Evelyn Wever-Croes tabata votegetter den ultimo eleccion cu 7518 voto. Y claro esey ta mata otronan di envidia. Sinembargo no ta hustifica e comportacion baho ey di Parlamentarionan Gerlien Croes y Mervin Wyatt-Ras. E comportacion baho aki di e dos parlamentarionan femenino aki, a wordo rechasa den comunidad tambe, especialmente den nan votadornan.
