Segun Parlamentario Evelyn Wever-Croes:
ORANJESTAD (AAN): Parlamentario Evelyn Wever-Croes di Fraccion MEP den reunion den Parlamento a expresa su preocupacion tocante e intencion di Futuro pa tuma e presidencia di e unico comision cu oposicion tin, esta e Comision Fiho di Finanzas.
Wever-Croes a indica cu su colega, Parlamentario Shailiny Tromp-Lee di Fraccion di MEP ta presidi e comision aki pa casi dos aña. Segun Wever-Croes, esaki ta e comision cu mas reunion a tene den Parlamento y, bou di presidencia di Tromp-Lee, tur instancia y instituto cu a solicita pa ser scucha a haya e oportunidad pa expresa nan preocupacionnan pasobra nan no ta haya oido cerca AVP ni Futuro.
“E unico comision cu a funciona ta esun di finansa. E unico comision cu a yama 15 reunion. Y awo kier kit’e y pone den man di un hende cu no a yama ni un reunion”, e parlamentario a bisa expresando un disgusto.
E parlamentario ta cuestiona e exigencia di Parlamentario Ruthlyn Lindor di Futuro pa tuma e presidencia. Parlamentario Lindor mes ta presidi e comision derecho di hende muhe y, segun Parlamentario Wever-Croes, nunca a yama un reunion.
“Pakico mester kita un comision cu ta funciona, di un presidente cu sa con pa presidi un comision, pa entrega esaki na un persona cu no ta yama reunion”, e parlamentario ta cuestiona.
Segun e parlamentario, Fraccion di MEP a pidi varios biaha un rason pa esaki, mientras cu e fraccionnan cu ta sostene e gobierno ta sinta den Parlamento cabes abou di berguensa, pasobra nan no tin niun splicacion pa esaki y tampoco nan ta worry pa duna cuenta.
Parlamentario Wever-Croes a remarca cu ora cu a puntra Parlamentario Lindor pakico kier kita e presidencia for di MEP, Parlamentario Lindor su reaccion tabata cu e no tin cu duna cuenta na ningun hende, pasobra segun e parlamentario di Futuro, esaki ta democracia.
Esaki no ta democracia, sino un forma di conducta dictatorial den Parlamento. “Democracia no ta un wega. Democracia no ta un regalo. Democracia ta un deber. Y ta nos deber pa cuid’e”, Wever-Croes a enfatisa.
Parlamentario Wever-Croes a enfatisa, cu na momento cu Presidente di Parlamento Marlon Sneek kita e unico comision cu oposicion tin, pa entrega esaki na un persona cu no ta yama un reunion, e ta demostra un biaha mas cu e ta e pio Presidente di Parlamento cu nos pais conoce. Y tur Parlamentario cu ta sostene esaki, ta un acto contra nos pais.
“Un otro dia scur pa democracia y pa Parlamento, kitando e poco oportunidadnan cu oposicion tin. Dictatura a drenta Parlamento un biaha mas”, Parlamentario Wever-Croes a enfatisa.
