Parlamentario Jennifer Arends-Reyes:
ORANJESTAD (AAN)-- Parlamentario Jennifer Arends-Reyes, di Fraccion di AVP, den entrevista cu DIARIO a expresa cu e discusion tocante e vehiculonan UTV y ATV ta valido.
El a recorda cu e tempo cu tabata tin pandemia, unda tur cos a bay plat, despues poco, poco Aruba a recupera, y na e momentonan aki, Aruba ta den demanda.
“Pero e ta exigi tambe di nos di tin un responsabilidad pa carga cu ne, unda nos tin cu purba wak con nos por yega na un parti di sostenibilidad, aunke nos ta casi pasando e stap eynan caba, cu nos ta bay den e parti regenerativo.
“Awo, nos tin cu bay considera tambe cu locual ta trata turismo e tin di haber cu planning. Planning kiermen, cu hopi biaha e parti di crusero, e parti di avionnan, tur tin acuerdonan caba firma di dos, tres aña”, e dama parlamentario a splica.
El a indica cu si bay cu planning e ta tuma su tempo, algun aña atrobe, pa wak con Aruba por ahusta e “business model” tambe, pasobra APA, y Aeropuerto y ATA, cada un tin su modelo economico. “Y nos tambe, como Gobierno y Parlamento tin cu wak e ora ey, con ta e parti di economia tambe, y con nos ta wak e parti di naturaleza. Tin diferente stakeholder akinan cu nos tin cu considera, pero naturalmente tin tambe esnan cu ta urgente aworaki. Bo tin cu atende cu tur, bo tin cu scucha nan tambe, y bo tin cu tuma e miho decision posibel, na e momento eynan”, Parlamentario Arends- Reyes a señala.
Arends-Reyes, a remarca cu Aruba tin hopi reto aworaki, pero naturalmente, dialogo ta keda sumamente importante. “Nos por a wak diferente documento cu a sali afo di añanan cu a pasa, pero aworaki tin cu atende cu nan, pasobra, si bay directamente al grano, claramente e stakeholders ta e tour operators cu talvez no tabata na haltura y tabata asina leu cu nan a planea pa dos, tres aña”, Parlamentario Jennifer Arends-Reyes a señala.
