Fundacion Formacion Politico Nelson Orlando Oduber a organiza charla "Augustus Scur"

ORANJESTAD (AAN): 24 di augustus na Cede di MEP, Fundacion Formacion Politico Nelson Orlando Oduber

a organisa un charla tocante Augustus Scur, y e efecto di tur e manifestacionnan riba e logronan grandi di Aruba. Lider di MEP Sra. Evelyn Wever-Croes ta gradici Danki na Nel Oduber pa e charla interesante y pabien na Michella Steenvoorde Laclé pa organisa e evento exitoso.

            Partido Movemento Electoral di Pueblo (MEP) algun tempo atras a lanta un fundacion pa motibo cu ta sinti e necesidad pa lanta pa yuda den formacion di politiconan nobo. Ora cu tabata preparando pa lanta e fundacion a bisa cu lo ta bon pa politiconan nobo haya e base firme di kico ta politica, kico MEP ta para pe, y kico ta e ideologia social democrata y logronan.

            E fundacion aki a haya e nomber Fundacion Formacion Politico Nelson Orlando Oduber. E politico cu pa nos di partido MEP ta e miho politico cu por a guia nos pais den su Status Aparte. Prome Minister 4 biaha di nos pais, y logronan enorme, Sra. Wever - Croes a expresa. ‘Danki na e vision y na e liderazgo di ‘Nel’, nos por a logra cu Aruba despues di Status Aparte a para riba su pia.’ Nel a lidera e gobiernonan di Gabinete Oduber I te cu IIII na un forma integro, responsabel y  prinicpalmente cu curazon pa ‘e hende’. Nel nunca a lubida e hendenan rond di dje y semper el a keda cu e pueblo y cu votadornan di partido.

            ‘Mi ta orguyoso di ta miembro di e partido y di lidera e partido. Pesey, kico mas bunita cu pa e fundacion cu a lanta, por carga e nomber di Nel.’

            Miembronan di e Directiva ta Jerehm Campbell y Gene Nahr, Secretario di Fundacion Randolf Vrolijk, Tesorero di Fundacion Gos Oduber y na cabes di e fundacion ta sra. Michella Steenvoorde - Lacle como Presidente di e Fundacion.

            Concluyendo, Lider di MEP Sra. Evelyn Wever-Croes  a gradici un y tur pa a acepta e invitacion y pa ta presente na e prome encuentro oficial publico di e fundacion aki.