Encuentro exitoso di Fraccion di MEP cu gremionan sindical y comercial riba tema HOFA

Parlamentario Evelyn Wever-Croes:

ORANJESTAD (AAN) – Fraccion di MEP a reuni cu gremionan sindical y comercial pa discuti Ley di Reino HOFA. Segun Parlamentario Evelyn Wever-Croes, ta deber di MEP pa mantene comunidad bon informa riba e tema, un esfuerso cu nan ta haci desde augustus 2025. “Si comunidad no ta bon informa, nos por perde hopi pasobra comunidad no ta na haltura”, el a a declara.

Durante e encuentro, MEP a comparti e consehonan mas reciente di Raad van Advies di Aruba y Raad van State di Hulanda. Wever-Croes a enfatisa cu e discusion principal no ta si Aruba mester supervision financiero, pasobra e supervision ya ta existi, ni tampoco si HOFA por trece beneficio financiero. Segun e, e discusion central ta e prijs cu Aruba mester paga pa obtene e beneficionan ey.

Raad van State, segun Wever-Croes, a señala cu ainda no tin claridad exactamente cuanto e beneficio financiero lo ta ni cua debenan Hulanda lo asumi. Esaki, segun MEP, ta crea incertidumbre y duda riba e bentahanan financiero cu gobierno ta presentando.

Fraccion di MEP ta cuestiona si un Ley di Reino ta realmente necesario pa regula supervision financiero y garantisa financiamento na interes mas abou. Posicion di MEP ta cu HOFA ta limita autonomia di Aruba mas cu loke e beneficionan hustifica.

Como ehempel, Wever-Croes a menciona cu decisionnan importante relaciona cu gasto publico, aumento di salario of contrata personal por termina bou influencia di Hulanda. Segun e, esaki no solamente ta afecta gobierno, sino tambe comercio, empleadonan y henter comunidad, pasobra Aruba lo perde parti di su capacidad pa tuma decisionnan propio.

“E prijs real ta cu Aruba ta entrega parti di su autonomia y e ultimo palabra riba su finansas”, Wever-Croes a sostene.

MEP tambe a cuestiona pakico Aruba mester acepta un ley cu ta duna Den Haag mas influencia hustamente ora cu e pais ta mustra mehoria den su finansas. Segun Wever-Croes, debe publico actualmente ta na 61% di GDP y proyecta pa baha na 48% den dos aña, mientras cu Aruba a registra surplus pa tres aña consecutivo y ta entregando presupuesto na tempo. Aruba ta den cumplimento.

“Si Aruba ta cumpli cu e normanan y a demostra cu por maneha su propio finansas, pakico mester entrega e ultimo palabra na Hulanda?”, el a questiona.

Wever-Croes e expresa cu e propuesta oficial ta pa e gobiernonan negocia e cambionan recomenda pa e organonan di conseho, sin lanta for di mesa, pa asina convence Hulanda cu un Rijkswet no ta necesario. El a keda demostra cu nos ley local (LAft) ta duna e mesun garantianan sin duna Den Haag e ultimo palabra riba nos finansas. Den su luga, MEP ta propone un alternativa real: un landsverordening reenforsa of un onderlinge regeling cu ta garantisa supervision efectivo sin entrega nos derecho constitucional.

Parlamentario Wever-Croes y Fraccion di MEP ta gradici formalmente e asistencia y participacion activo di e representantenan di e gremionan sindical y comercial den e encuentro aki pa sinta discuti temanan importante manera ley di Reino HOFA y ta pidi nan pa comparti e informacion cu nan miembronan.