Segun Parlamentario Raymond Kamperveen:
ORANJESTAD (AAN)—Den un entrevista cu DIARIO, Parlamentario (awo Presidente di Parlamento) Raymond Kamperveen, a declara cu e situacion cu a culmina na caida di gobierno, ta uno cu ta andando pa basta dia of mas bien, basta luna caba.
El a subraya cu ora bo ta atende cu cierto cosnan cu tin di haber cu democracia, y para p’e, cu ta pa locual nan ta wordo scogi pa ta den Parlamento, ora algo bay robes tin cu trece dilanti, papia riba dje y busca solucion.
“Nos ta un partido cu ta busca solucion na bienestar di Aruba, y nos a purba di yega na un acuerdo cu nan, den e caso aki haciendo un plan di gobernacion enberdad. MEP tin e Voorzitterschap y esey a wordo palabra y nos tin e Vicevoorzitter caba. Den e caso aki tabata tin un diferencia di opinion ora a trata e ley di matrimonio di mesun sexo. Voorzitter a purba cambia e sistema di votacion, na conveniencia di nan fraccion”, Kamperveen a expresa.
El a agrega cu e ora ey oposicion y RAIZ no a bay di acuerdo cu esey. “Bo no por cambia esey riba e dia, y mester corda cu e dia ey e reunion a cuminza laat”. El a bisa cu e no a bay bon y nan a rectifica y tin un Institucion mas halto cu tambe a bisa e Voorzitter cu esey no por wordo haci riba e dia, y cu e no ta na su lugar pasobra tin un reglament-verordening.
“A base di esey, y tin yen di carta cu a bay Gobernador cu parti di e informacion aki, cu hopi di e parlamentarionan den Parlamento, a para pa democracia cu e no ta bon. Mi ta kere cu eynan el a cuminza y a escala te akinan”, Kamperveen a menciona.
El a señala cu fraccion di RAIZ no kier sona manera cu nan no ta razonable. “Pa nos no ta problema, na bienestar di Aruba djis cambia e nomber di e Voorzitter, duna nos un nomber y nos ta sigui. Pasobra con cu bay bin e ex-Voorzitter, Parlamentario Edgard Vrolijk ta un Parlamentario e ta, y Parlamento ta scoge e Voorzitter”, Kamperveen a relata.
E momento di e entrevista aki RAIZ tabata wardando pa un reunion cu Gobernador y wak con esaki lo a bay.
El a splica tambe cu tur loke ta riba agenda di ex-presidente di Parlamento, Edgard Vrolijk e tin cu tume over y ehecute, pero nada nobo e no por trata. E sa cu Minister Presidente a bisa Gobernador cu e Voorzitter nobo ta keda pa dos luna y mey.
Kamperveen a declara, finalmente, cu awe cu ta apertura di Aña Parlamentario 2024-2025, e ta haya su Landsbesluit como Presidente di Parlamento, y e tin su prome reunion ora Gobernador ta bishita nan, pa duna su discurso. Y djey e ta cuminza traha pa e reunionnan cu mester wordo yama, y regla e comisionnan.
