Parlamentario Dangui Oduber:
ORANJESTAD (AAN) Parlamentario Dangui Oduber, di fraccion di Partido Movimento Electoral di Pueblo “MEP”, den conferencia di prensa a trata e tema di e biahe den jet priva, cu Minister Gerlien Croes a realiza na Curacao, pa ricibi nan seleccion cu a clasifica pa e Copa Mundial 2026.
Oduber a expresa cu fraccion di MEP ta sinti cu tin falta di transparencia y un kiebro di integridad.
“Den e programa di gobernacion di e gobierno aki, pa 2025-2028, Gabinete AVP-Futuro, den diferente pagina nan ta bisa cu nan ta bin cu normanan di transparencia, cu nan ta un gobierno habri, cu no lo sconde informacion pa pueblo, cu nan lo promove transparencia den e aparato gubernamental, y sigur den Conseho di Ministro”, Parlamentario Oduber a declara.
El a sigui bisa cu otro punto di atencion den nan programa di gobernacion, riba pagina 18, punto 6, nan ta menciona cu cada peticion pa biahe di trabao, mester tin tres oferta di camber di hotel pa scoge esun di mas economico.
“ E realidad ta otro. Lamentablemente, e gobierno aki y sigur Gerlien Croes, no ta practica loke ta predica. Nan ta haci biahenan sin pidi ningun oferta, sin splica Parlamento cual ta e motibo di e biahe, sin scoge e prijs di mas economico, y awe nos kier adresa, specialmente, e biahe di trabao di Minister Gerlien Croes cu ya caba nos a gare den dos ocacion ta gaña pueblo y ta gaña Parlamento di Aruba”, Oduber a expresa.
Dia cu Prome Minister tabata den Parlamento pa trata e presupuesto 2026, el a wordo puntra si e tabata na haltura di e biahe di Minister Gerlien Croes, y na e momento ey e no kier a duna informacion na Parlamento, y despues di hopi insistencia nos a haya algun informacion.
“Loke a sali na cla e momento ey ta cu Minister Gerlien Croes ta cu el a gaña pueblo y a gaña Parlamento, pasobra e decision pa haci su biahe di trabao pa Curacao a wordo tuma den Conseho di Ministro fecha dia 20 di November, kiermen, riba e fecha aki e lo mester a haci su biahe di trabao. Esey ta e decision cu tin di Conseho di Ministro. Pero en realidad, el a biaha dia 19 di November. Ora nos a keda insisti, Prome Minister a entrega algun documento, y eynan caba nos a constata cu tin kiebro di integridad y falta di transparencia”, Parlamentario Oduber a reitera.
