Parlamentario Endy Croes:
ORANJESTAD (AAN): Parlamentario di Fraccion di MEP, señor Endy Croes ta haci denuncia oficial di posibel escandalo den FMSA, RdA y Minister di Husticia Arthur Dowers. Ta trata di compra di fuel, entre otro gasolin, diesel y jet fuel pa Aruba. E Parlamentario a remarca cu FMSA tin un contract cu Citgo desde 2016 pa entrega e productonan aki na nos pais na unda cu cada 18 luna, FMSA y su comision di evaluacion, ta haci un proceso di bidding pa busca miho ofertanan riba mercado. Segun Parlamentario Croes, Citgo tin derecho di preferencia pero si nan no por ‘match’ e prijs, FMSA por scoge pa termina e contract.
E Parlamentario a remarca cu dia 25 di Juli ultimo, e comision a pasa door di e proceso aki. Riba 8 di September nan a duna conseho riba e ganador di e bidding y a conseha pa kibra contract cu Citgo. Segun e parlamentario, Fraccion di MEP tin tur documento di e proceso aki como tambe e carta cu a bay riba 3 di October pa Citgo cu indicacion cu ta finalisa e contract cu nan y cu fecha stipula, teniendo cuenta cu 90 dia. Pa 1 di januari, Citgo lo no entrega fuel mas pa Aruba.
E compania Trafigura a gana e bidding y nan a wordo informa pa ta dia 13 di October na Aruba. Sorprendentemente, esnan cu Dowers a pone despues cu e gobierno a sinta, a ‘bypass’ tur e proceso di bidding y a manda Novem un oferta nobo.
“Esaki ta un compania cu no a participa den e bidding, cu segun nos tin entendi, ta amigo. Nos a haya e documento di e oferta aki cu e fecha di 17 di October. Nan a kibra cu e proceso completo, kibrando dignidad y integridad di pais Aruba. Fraccion di MEP ta urgi Minister Dowers pa contesta e 32 preguntanan den Parlamento, hunto cu e director y directiva y cu e comision di evaluacion. Segun Nos ta preocupa cu prijsnan di gasolin, diesel y jet fuel cu por sigui aumenta pasobra no tin un contract y por tin consecuencianan miyonario tambe den un caso asina. Nos ta preocupa y ta sali den defensa di nos pais”, Parlamentario Endy Croes a bisa.
