Declaracion di fraccion di AVP
ORANJESTAD (AAN): Manera ta poni den otro articulo den DIARIO, e Parlamentario Mike de Meza a dicidi na bula cura, pues el a sali for di AVP y entrante awo e ta un Parlamentario independiente na Aruba. Cu esaki, AVP awor ta cay na 8 asiento, mes hopi cu MEP. Partido Futuro tin su 3 asientonan, PPA tin 1 asiento, y awor Mike de Meza como independiente tin 1 asiento. Den ultimo eleccion, Mike de Meza tabata e di tercer ‘votegetter’ di Partido cu su 1.476 voto.
Riba Diadomingo mes, Fraccion di AVP a emiti un boletin unda nan ta lamenta cu Mike de Meza a dicidi pa sigui su caminda politico separa di AVP. Prome cu e decision, varios miembro di AVP a papia cu De Meza y a pidi’e pa reconsidera y keda forma parti di e fraccion.
“Nos ta reconoce su experiencia, su aporte y e trabao cu el a haci pa Aruba. Tabatin un diferencia den un fecha pa pone riba e concepto di mocion. Desde 1 di januari of den prome kwartaal di 2027. E esencia di e peticion ta cu ta pidi gobierno bin cu un aumento pa salario minimo. Diferencianan di opinion por surgi den cualkier partido y, pa nos, e prome paso semper mester ta dialogo, comprension y e buskeda di un forma pa sigui traha hunto,” e boletin ta indica.
“De Meza a tuma su decision despues di considera e situacion. Fraccion di AVP ta respeta su decision, aunke nos lo a prefera pa el a keda. Nos no ta mira e situacion aki como un motibo pa lubida e contribucion cu el a duna durante su tempo den e fraccion.”
AVP ta sigui enfoca riba su responsabilidad cu e pueblo di Aruba. Nos ta representa votadonan cu a duna nos nan confianza y nos mester sigui traha cu seriedad, respet y compromiso pa e bienestar di e pais.
Nos ta gradici De Meza pa su aporte y dese’e exito den e siguiente etapa di su trayecto politico. E decision di bay ta di e mes, y nos ta respeta esey.
