Otmar Oduber (PPA):
ORANJESTAD (AAN): Durante conferencia di prensa di fraccion di PPA, parlamentario Otmar Oduber y fractiemedewerker y miembro activo di PPA, Eduard Pieters a entrega un ‘minderheidsnota’ na Presidente di Parlamento. E ‘minderheidsnota’ aki tin vision, pensamento, alternativa y posibel solucionnan di PPA pa loke ta trata e discusionnan cu ta andando actualmente di Rijkswet, cu ta bastante polarisa.
PPA a tuma rienda
“Manera ta conoci cerca boso, esaki no ta un topico cu ta awor nos a cuminsa cu ne, manera cu el a bira awor na Aruba. Fraccion di PPA a haci peticion for di januari pa un Reunion Publico, y awor casi cabando september ainda esaki no a tuma lugar,” ta loke Otmar a cuminsa na aclarea. Loke ta mas notabel ta cu, ningun partido no tabatin e curashi tampoco pa hiba e discusion di Rijkswet den comunidad. Mirando cu e lunanan ta pasando y cu Presidente di Parlamento no ta yama e reunion pidi for di januari y tampoco niun partido ta sali di informa comunidad, gremio, sindicato, instancia, PPA a tuma rienda y a cuminsa sinta den luna di juni y juli cu nan ronda di consulta . “PPA ta satisfecho cu mayoria di e gremionanan den nos comunidad, sindicato, comercial y otro instancia manera OPA, a responde positivo na e ronda di consulta. Nos a pone enfasis for di inicio, cu nos ta papia di forma un frente nacional. Un causa unda mester uni e pueblo aki”.
Polarisacion y su impacto
Segun parlamentario Oduber: “Door di tanto polarisacion, comunidad tin un bruhamento grandi y ni partido MEP ni partido AVP kier asumi nan responsabilidad y ta keda culpa otro. Fraccion di MEP ta bisa cu ta un ley traha y firma pa e gobierno aki y fraccion di AVP ta bisa cu nan a djis sigui cu loke MEP a dicidi y laga atras. Pues e informacion cu ta sali pa comunidad ta uno hopi bruha y confuso. Y riba dje, cada biaha ta bin un documento mas dilanti y concepto traha den pasado.”
Delegacion saliendo sin sosten di Parlamento
Loke ta mas lamentabel ta, cu e comision cu ta atende cu IPKO, ta sali diasabra awor. “Pero Parlamento mes y 24 ora prome cu e delegacion sali pa Hulanda, no tin un unidad y mucho menos tin sosten di Parlamento pa loke ta trata agenda y standpunt,” Otmar a enfatisa.
Rond di 3500 hende exclui
E caso cu Otmar a lanta den corte ta cuestion di principio y e ta respeta e decision di corte, a pesar di no ta di acuerdo cu loke hues a indica. Otmar ta di opinion cu un parlamentario ta representa un ‘stemmer’, pues esunnan cu a vota p’e y tin cu represent’e sin limitacion. “Na e momentonan aki nos a wordo limita, door cu ami no por participa na e reunionnan ey den e comision cu ta trata e topico y e posicion di Aruba na IPKO. Pues bo ta exclui un parti di bo comunidad y sigur e 3500 hendenan cu a vota pa PPA”. Otmar a elabora cu den tur comision tin un representante y nan ta splica nan coleganan den fraccion kico nan ta dicidi den e comision. “Pues PPA no ta den e comision y PPA no ta haya informacion. Nos no conoce posicion di Aruba, nos conoce e polarisacion pa loke ta trata opinion, puntamento di dede riba otro, pa loke ta trata opinion di Rijkswet, pero nada mas. P’esey e ‘minderheidsnota’ aki ta fundamental pa nos.”
Pa conclui PPA ta di opinion cu e discusion riba Rijkswet no por keda na un wega politico di culpa y manipulacion. Pueblo mester claridad, unidad y direccion, no mas bruhamento. Cu entrega di e ‘minderheidsnota’, fraccion di PPA ta mustra liderazgo y curashi pa pone alternativa concreto riba mesa. Segun Otmar Oduber y Eduard Pieters, Aruba mester busca un frente nacional unda pueblo y Parlamento ta uni, pa defende nos autonomia y futuro, sin mira color politico.
