Parlamentario Xiomara Maduro:
ORANJESTAD (AAN): Parlamentario Xiomara Maduro a tuma nota di e caso cu sra. Sabine de Groot a gana contra Land Aruba, specificamente contra Minister Gerlien Croes. Eyden por lesa cu Gerlien ta abusa di su poder como minister pa kita Sabine di trabou sin motibo valido. Esaki ta un caso lamentabel di persecucion politico riba un hende cu a haci mas trabou na bienestar di Aruba, cu Minister Gerlien Croes mes a haci te awo.
Trabou duro den pandemia
E ta conoci cu Sabine de Groot a haci un trabou grandi pa Aruba durante pandemia pa yuda cu FASE pa miles di persona cu a keda sin entrada. Tabata un esfuerso grandi cu Sabine a haci bou di un presion enorme cu e tempo di inseguridad di covid 19 a trece cune. Anto e tempo ey ta kico Gerlien a haci pa Aruba? Net nada.
Encarga cu Landspakket
No por lubida cu bou di e mesun presion di pandemia, Sabine a traha incansablemente tambe riba reformanan laboral den cuadro di Landspakket. Y kico Gerlien tabata haci e tempo eynan? Drumi dushi na su cas, traha bolo y kuki?
Mehora Enseñansa pa Empleo
Sabine a bay traha na Enseñansa pa Empleo na unda ela percura pa habri un sucursal di Enseñansa pa Empleo na San Nicolas hunto cu EPB school. Sabine den cooperacion cu AHATA a profesionalisa Enseñansa pa Empleo na unda ta ofrece awor e curso nobo di Casino Dealer y tambe e curso avansa di Waiter certifica pa AHATA. Sabine a logra tambe pa e curso di Klein Vaarbewijs conoce un parti practico y wordo reconoci pa Directie Scheepvaart. Ta cursonan cu hopi hoben ta sigui exitosamente y ta yuda nan cu habilidad pa haya un trabou digno na Aruba. Gerlien ta minister encarga cu hoben, anto net e minister aki ta core cu un hende cu a haci asina hopi trabou pa yuda hoben na Aruba?
Gerlien su trabou ta “valt vies tegen”
Ta un berdadero lastima pa mira Gerlien persigui Sabine, kende a haci mas trabou na bienestar di Aruba, cu Gerlien mes a haci. Cu tur respet, Minister Gerlien Croes su trabou te awo ta uno echt sin contenido y sigur despues di e pifia aki di persecucion politico di un hende cu ta traha duro na bienestar di Aruba, ta “valt vies tegen.”
