Parlamentario Alvin Molina di MEP:
ORANJESTAD (AAN) – Alvin Molina, Parlamentario di MEP, a expresa, refiriendo na e hecho cu Departamento di Infrastructura y Planificacion (DIP) a haya un director suplente, cu ora tin sanger nobo e ta trece speranza y ideanan nobo.
No obstante, cu un tono decepciona, el a bisa cu ainda e no tin e bon noticia pa pueblo pasobra nada a cambia den seis luna na DIP.
Di otro banda di cambio di director, e proceso na DIP ta bolbe cuminza p’e como Parlamentario. El a bisa cu e reunionnan a tuma lugar, preguntanan ta wordo haci atrobe, y e ta mira unda DIP ta para awe, comienzo di 2024, contestanan ta sali aki aya, pero esey no ta locual ta boga p’e.
“No ta locual nos kier ni loke pueblo ta pidi p’e. E nivel di servicio na dado momento mester ta optimal, pa hendenan por, alomenos, haya un contesta riba nan peticion. Un contesta cu ta SI dal bay cu bo proyecto of NO ta pa tal y tal motibonan, pa hendenan por sa cu esey nan falta ainda, y cu kizas nan ta na tempo pa haya un si riba termino medio. Pero esey no ta pasando, anto ultimamente mi mes, siman pasa, a bisa laga mi acerca minister atrobe, cu ta esun politicamente responsable cu esaki p’e sa kico ta e situacion”, e parlamentario a señala.
El a agrega cu e mes a haci preguntanan manera con ta bayendo rond di Agricultura, rond di e desaroyo di pariba di brug, y si un parlamentario no por haya e contesta ey, e ora ey ki speranza tin pa e ciudadanonan. “Cu cosnan no ta cana di un dia pa otro y ta tuma tempo pa mehora, mi por imagina. Pero awo, seis luna despues cu a cambia e director, mi ta kere cu a bira tempo pa nos por wak un mehoracion un tiki mas grandi, y mi ta kere como parlamentario cu mi mester para akinan y duna un noticia mucho miho cu enberdad tanto cos a sosode den un bon direccion, anto pueblo por conta den un temporada cortico cu tin mehoracion; y mi no tin e contesta aki na e momento aki. Mi mes lo puntra minister atrobe pa interveni, y puntra kico ta bay ta e siguiente paso y kico pueblo por spera pa cu e servicio di DIP”, Parlamentario Alvin Molina a enfatiza.
