Otmar Oduber, lider di Plataforma Nos Pais:
- Pa bisa ta basta nos kier un cambio den e pais aki!
ORANJESTAD (AAN) Otmar Oduber, Lider di Plataforma Nos Pais, cu recientemente a wordo lanta, den un conferencia di prensa reciente, a sigui elabora riba e situacion di e mas di 18 mil pensionadonan cu tin na Aruba bibando cu un entrada mas abao cu 8 mil florin pa luna.
Oduber ta cuestiona cu 21 miembro di parlamento no a lanta ni un dia pa defende 18 mil pensionado aki na Aruba, pero tur dia nan ta punta dede y ta play heroe contra Hulanda. “Pero ora nos ta cu Hulanda nos ta come olieballen y croquet cu ne, pero ora nos yega Aruba nos ta hunga heroe ataca Hulanda”, Oduber a expresa.
El ta puntra si nos pensionadonan, esnan cu ta sufri y cu a traha trinta, cuarenta, cincuenta aña di nan bida, ta husto pa nan biba pa awe nan tin cu biba cu 800 y pico florin? Oduber a splica si, cu tin pensionadonan cu ta biba cu entre mil pa 5 mil florin pa luna, pero 18 mil ta biba cu menos di 8 mil florin, el a reitera.
Y di e 18 mil pensionadonan aki tin cu ta biba cu menos di 400 florin. “Mi yamada awe ta, ban papia riba e cosnan aki, ban uni tras di e transformacion di Pais Aruba na beneficio di esnan cu tin mas mester den nos comunidad.
Ban stop di pleitamento y di papia di lanta partido politico pasobra nos tur kier bira lider. Next eleccion mi ta kere nos lo tin 18 partido politico na Aruba, pasobra tur hende kier bira lider di nan mesun portico”, Otmar Oduber a remarca.
“Na final di dia nos sa kico e resultado di eleccion ta atrobe, si nos no bisa cu basta na Aruba cu tradicion” Oduber a señala. Segun e politico lo yega un momento cu pa tin un movecion na Aruba, dinamico, revolucionario, cu ta bisa “ta basta, nos kier cambio den e pais aki, y esey ta loke Plataforma Pais aki ta para p’e!” Oduber a conclui.
