Jayburtt Dijkhoff (PhD) a bay Corte pa atende su caso:
*Veredicto lo tuma lugar dia 4 di Mei venidero
ORANJESTAD(AAN) Iniciando e siman aki, e Director di Instituto di Calidad, Jayburtt Dijkhoff (PhD), tabata den Corte ya cu su caso por fin a bin dilanti, despues cu na Augustus 2025 el a wordo suspendi di su trabao, pa un simpel “facebook post” cu el a publica.
Den entrevista cu Matutino DIARIO, Dijkhoff a expresa cu esaki ta algo hopi interesante pa e ambtenaarnan.
“Pasobra tin hopi medida cu un dunador di trabao, manera gobierno, por tuma pero awendia nos no ta den un situacion autoritario mas; awendia ta wordo verwacht cu tin Recurso Humano, cu nan ta yamabo pa un combersacion. Ban bisa, si ta cay un warning mes, nos ta bay segun e procedurenan normal, etc. Pero aki nos a wak cu a dicidi, den mi caso, cu no ta papia cu mi ningun momento, a dicidi di duna mi un suspension, no a sospecha ningun momento, no a haci investigacion, y pa e motibo ey, pa mi caso en particular, mi a bin puntra Huez si e ta haya cu esey ta husto, pasobra no ta trata solamente di mi persona, pero di tur ambtenaar awo y den futuro”, Jayburtt Dijkhoff a señala.
El a agrega cu pa pueblo di Aruba mes ta hopi interesante pasobra aki ta bay wak si ta tin coreccion estatal, di casonan asina, pa ora nan haci mal uso, di un poder politico unda cu normalmente tin un procedure cu ta bay segun ley ta bisa, a opta pa use pa otro finnan. “Y mi ta haya hopi interesante pa den e caso aki, pueblo sa kico ta bay pasa”, Jayburr Dijkhoff (PhD) a declara.
El a agrega cu en todo caso, si Huez dune of no razon, dia 4 di Mei proximo, cu ta e fecha di e veredicto, toch ta informacion valido y valioso cu su persona ta bay uza pa lanta un organizacion completamente nobo na Aruba, cu aworaki ta bao di e nomber “Asamblea di pueblo”.
“Pakico? Pasobra no ta cu nos ta contra di Gobierno, ni contra institucionnan, pero e ta bay pa duna cuenta, pa tin un balansa. Y nos ta kere cu a yega tempo pa pueblo di Aruba, e ciudadano, wordo empodera, pa nos complementa Gobierno cu kico ta biba bao di pueblo, haciendo uso di esakinan”, señor Jayburtt Dijkhoff a remarca.
